Kongazçik küüyündä göl kuruyȇr. Bu yaşamak erindä problema bitki 3 yılın süresindä var. Kongazçik gölün arendatoru Harlampiy Uzun annadȇr, ani büünkü günä suyun uuru göldä düştü, göl heptän küçüldü. Uzun annadȇr, ani buna sebep diil sadece kuraklık, ama çukurlar, angılarını kazdılar çiftçilär bostannarı sulamak için. Bölä, arendatorun laflarına görä, sular, angıları akȇr gölä duruklanȇr bu kuyularda.
Küüyün bostancıları istämedilär kendileri sebepleri açıklasınlar, ama kamerasız annatılar, göldä kalmadı su kuraklık için. Onnar sayȇrlar, ani arendator lääzım paklasın gölü mıldan, angısı toplandı su sızıntısının dibindä çok yılların içindä. Bu yardım edecek göl kurumasın.
Arendator annatı, ani danıştı primariyaya, ekologiya kurumnarına, ptokuraturaya. O sayȇr, ani problemayı çözmää deyni lääzım kotlovannarı kapatmaa.
«Hepsi kararlȇr. Primariyaya yazdim, ekologiya kurumnara yazdim, Saymak Palatasına da, hepsi biler, ama karar bu soruşta taa yok»,- Kongazçik gölün arendatoru Harlampiy Uzun annadȇr.
Küüyün başı Evgeniy Tukan, gerçekledi bu problemayı hem kotlovannarın kanona karşı kazmasını.
«Bu kuyular kazılmış kanona karşı, kendibaşına, izinsiz” “Cuma günü küü nasaatın toplantısı olacek, da biz çıkacez soruşlan vermää parayı primariyanın büdjetından kapamaa bu kotlovannarı, çünkü var ekologiya kurumun kararı. Ama düşünmeerim, ani bu olabilecek, çünkü buna deyni çok para harcanacek. Bän lafettim nasaatçılarlan hepsinin bir bakışı var – kapamaa kuyuları lääzım diil primariya kuvetlerinnän, bunu lääzım yapsınnar onnar, kim kazdı bu kuyuları»,- Küüyün başı Evgeniy Tukan söledi.
Çiftçilik bakanı Sergei İbrişim annatı, ani halizdän göllär yapılı sulamak için ama diil balıkçılık için.
«Başçıvancılık ilerleyecek sade ozaman açan agrariyaların olacek hakı gölleri kullanmaa, ozaman onnar tertipleyeceklär gölü , alaceklar oradan suları. Bu göllär lääzımnı olacek başçıvancılık ilerlemäk için ama diil balıkçılık için»,- Çiftçilik bakanı Sergei İbrişim annatı.
Sergey İbrişim sayȇr, ani gölleri lääzım vermää arendaya çiftçilerä, angıları yapaceklar lääzımnı işleri göllerin ilerlemesi için.
«Alalım nicä örnek gibi bir gölü: arendator öder onun için 30-40 bin ley primariyanın büdjetına. Ama biz alarsak da paklarsak o gölü, onda 15-20 çiftçi işleyecek, angıların zarzavat suan karpuz yada morkva bereketi ii olacek . Bu gün suvannarı sularsak onnar verecek 80 ton bereket ektardan. Karpuzlar verer 60 ton ektardan. Bu gün karpuz tutarsa 6-7 lei, o zaman bu olcacek bek bereketli hem gelirli kultura angısı verecek 200 bin lei. Kongazçik çiftçileri bu soruşta göstürdülär ani bölä var nasıl olsun»,- Sergey İbrişim sayȇr.
Arendator Harlampiy danışȇr kuvetlerä çözsünnär problemayı çünkü bölä da gidärsa ileri dooru göl kuruyacek. Onun laflarına görä bu problema lääzın tez çözülsün.Nışannȇrız ani göllerin probleması kalȇr açık. Gagauziyada 18 göllerdän 10 kötü halda bulunȇr.
