Moldovada Halkın sayılmasının başarılmasınadan kaldı bir afta. Nettlän taa çok insan katılsın sayılmaya devlettä açıldı 43 staţionar punktu, nereyi yaşayannar yakışacek danışsınnar da doldursunnar lääzımnı anketayı. Gagauziyada bola puktlar açıldı Komratta, Valcaneştta hem Çadır kasabasında.
Vermää kolaylık taa çok insan katılsın Halkın sayılmasına – bölä neetlän açtılar staţionar Halkın sayilmasinin punktalırıni. Butakım punktlar işleyecek Gagauziyanın herbir bölgesindä. Orayı yakışacek danışsınnar avtonomiyanın yaşayannarı, angılar türlü sebeplerä görä taa etıştirmedilär pay almaa Halkın sayılmasında, annadȇȇr supervizor Roman Homenko.
«Orak ayın birindä Moldovada açıldı 43 staţionar Halkın sayılmasının punktu. Gagauziyada açıldı üç — Komratta, Valcaneştta hem Çadır kasabasında. Komratta o bulunȇȇr – primariyanın üçüncü katısında, statistika kabinetında, Valcaneştta – bölgä administaţiyanın yapısında, Çadırda — Bolgarskogo 37 sokaanda, ilerki üçüncü okulun erindä»,- annadȇȇr supervizor Roman Homenko.
Staţionar Halkın sayılması punktalırı işleyecek sabaanın sekizindän avşamın dokuzadan. Orada insannara teklif edilecek iki variant Halkın sayılmasına katılmak için.
«İnsanın olacek kolaylıı seçmää bir variant ikidän – yada yazılmaa da doldurmaa anketayı staţionar punkta Orak ayın ediyadan, yada yazılmaa da istemää Halkın sayılması geçirilsin insanın evindä, bunu yakışacek yapmaa Orak ayın altısınadan. Bu punktlar işleyecek sabaanın sekizindän avşamın dokuzadan. Yakışacek gelärsiniz yada açasınız telefonu da pay alarsınız Halkın sayılmasında»,- söledi Roman Homenko.
Gagauziyanın yaşayannarı paylaştılar, naşey düşünerlär Halkın sayılması için.
«Bän yazıldım. Yazdirttım kendimi hem aylemi».
«Kaç yıl oldu onu geçirmedilär. Lääzım bilelim nekadar insannarımız var, nesoy yaşȇȇrlar onnar».
«Herkezin kendi fikiri var. Bän düşünerim ani lääzım, yok ne saklamaa».
«Bizä hiç gelmedilär».
«Onnarın hep okadarar var kendi satistikası, kaç kişi duudu, kaç öldü, kim neredä bulunȇȇr. Ama bän katıldım. Formaları doldurdum, ne yapmaa lääzımdı, yaptım».
«Bizä geldi insan, angısı Halkın sayılması geçirärdi. Aannatık kim biz hem neredän. Düşünerim, ani bu lääzım, bilelim kaç insannarımız var, kaç gitti aşırıya, kaç kaldi, kaç geldi başka memleketlerdän».
«Katıldım ona, ama neçin o lääzım annamȇȇrım».
«Katıldım bän da».
«Katıldım. Onnar beni soruşturttular, bän onnarı. İi geçti».
Nışannȇȇrız, ki Çiçek ayın sekizindä Moldovada başladı Halkın sayılması. Orak ayın ediyadan lääzım soruşturmaa hepsi Moldovanın yaşayannarını da toplamaa onnarın yaşamak eri için, aylä hem dil için informaţiyayı.
