Tarakliya kasabanın Stepan Tanovun adına Kultura Evi nışannadı kendi 65-ci yıl dönümünü, geçirip gözäl bir regional festivalini, neredä pay aldılar türlü yaradıcılık kollektivleri.
Geçän dinnenmäk günnerindä Tarakliya kasabasının Kultura Evindä geçti bu kurumun 65 — ci yıldönümü. Kendi sözündä Kultura evin başı Anna Kıssa annattı, ani bu Kultura evini düzmää deyni er verildi 1954-cü yılda. Ama kaldırmaa burasını çekettilär 1957-ci yılda, çiçek ayın birindä.
«Diil çoktan, 5 yıl geeri biz nışannadık Kultura evin 60-cı yildönümünü. Etiştirmedik annamaa, nica enidän gözäl yortu geldi — bu yıl bizim Kultura evimiz 65 yılı kutlêêr. Biz deeriz bizim, çünkü hepsi — kim sţenaya çıkêr, kim zalada oturêr — hepsinä deyni bu büük yortu. Biz hepsimiz kutlamakları kablederiz. Yortumuz kutluca olsun!»,- dedi Anna Kıssa, Kultura Evin başı.
Tarakliya dolayın başın yardımcısı Sergey Filipov nışannadı, ani Kultura evi çok yıl geeri açtı kapularını diil kolay vakıtlarda.Ozaman aaz kurum ilerläärdi. Bu olay gösterdi ruh kulturasının kaaviliini. O kutladı hepsini bu yortuylan .
«Kultura Evindän geçti yakın 80 proţendä insan bizim kasabamızda, çünkü herbir uşaan vardı burada zanaatı- ya oyun kolektivindä, yada vokal grupasında. Onuştan bu yortu hepsi yaşayannarın günü, neylän bän hepsini kutlêêrım»,- Sergey Filipov nışannadı.
Önemni musaafir yortuda oldu Tarakliyada Bulgariya devletin Konsulu Lübomir Dimov. O urguladı, ani Kultura evi büük eri kaplêêr genç evladların terbi etmesindä. Bu 65 yılın süresindä burada korunêrlar hem ilerleerlär adetlär.
«İsteerim bütün ürektän sizi kutlamaa, kultura izmetçilerini, artistleri bu önemli günnän. Dua ederim saalık, ihlam, motivaţiya hem üüsek başarları»,- Tarakliyada Bulgariya devletin Konsulu Lübomir Dimov urguladı.
Oyun kollektivleri, vokal grupaları hem artistlär geldilär kutlamaa Kultura evin kollektivini bu onemli günnän.
«Biz Drokiyadan geldik, Busuyok ansamblisi. Pek sevineriz , ani bulunêrız burada.Söleeriz en ii kutlamak laflarını Kultura evin yıl dönümünnän baalı. Çok saalık dua ederiz, umut, dostluk halklar arasında olsun. Toplayın taa çok insan burada. Pek gözäl büün hem insannar bu gün kısmetli».
«Kutlêêrız Tarakliyanın Kultura evini, dua ederiz yaratmak uurunda başarları için, çok eni ideya, ki onnar aslıya çıksınnar. Ko olsun taa çok genç sizdä, ki onnarlan işlemää».
«Kutlêêrız bu yortuylan Kultura evini, pek beeneriz burada sţenada oynamaa, neçinki geler çok insan, da bakêr bizä. Türlü devletlerdän».
Talakliya kasabasının yaradıcılık evin başı Anna Voytoviç çok yıl çalıştı Kultura evindä. Ona deyni bu yortu pek önemni.
«Kendi Kultura Evimizä isteerim dua etmää ki açsın ileri dooru da kapularını. Taa çok gençlär meraklansınnar yaradıcılıklan. Onnar bizim aardımıza ilerledeceklär hem koruyaceklar adetlerimizi. Isteerim, ki o uşaklar göstersinnär kendilerini halklararası uurunda, da hepsi bilsin Taraklı için»,- Anna Voytoviç dedi.
Yaradıcılık kollektivlerin gözäl oyunnarı doldurdular zalayı taa pek yortulu keflän. Siiredicilär da herbir artisti kaarşıladılar. Ayırı dikkatlık oldu Kultura evin kolektivinä. Onnara verildilär şükür etmäk kiyatları hem para sertifikatları.
Avtor: A. Karapirä, operator hem montaj: L. Arfanos