60 yıldönümünü Valkaneş №1 uşak başçası nışannadı. Bu yılların süresindä üürenmäk kurumunda çok iş diişti. Koşullar taa ii oldular.
Valkaneş kasabasında Romaşka uşak başçasında 200 uşak terbiediler.Uşakları 22 üüredici terbieder. Bu için başında menecer Nadejda Hadji durȇr. O 30 yıldan zeedä bu uşak başçasında önderci görevindä çalışȇr.
«Bizdä pek ii kollektiv. Hepsi açık ürekli, professional uurunda çalışȇrlar. Bän hodullanȇrım, ani çalışȇrım burada okadar çok yıl»,- dedi Nadejda.
Yortu kutlamaklarlan, gramotalarlan, baaşışlarlan geçti. Uşak başçasının ilerlemesi için noutbuk hem printer regional hem erli kuvetleri verdilär. Bakannık komiteti başı yardımcısı Viktor Petrov nışannadı, ani uşakları terbietmää diil kolay. Üüretmäk sferasını lääzım tutturmaa.
«60 yıl — pek büük bir data. İsterim kutlamaa hepsi üüredicileri bu dataylan. Pek onemni, ani 60 yıl içindä pek çok uşak çıktı buradan. Bu iş pek önemni bizim geleceemiz için. Ne ekecez, onu da toplayacez. Bu bilgilär, angılarını üüredicilär vererlär uşaklara, bu temel bizim Gagauziyanın geleceenä»,- Viktor Petrov nışannadı.
Çoyu terbiedicilär kablettilär dipomnarı hem baaşışları. Gagauziya Şannı üüredicisi adını verildi üürediciciya Şerban Valentinaya: «Bän bitirmektän sora 82 yılda büünkü günä kadar 43 yıl burada çalışȇrım. Kolverdim 9 vıpusk. Pek beenerim benim işimi, kollektivi. Pek kolay girdim bu kollektivä. Beenerim uşakları, işimi, yardım oldular yannaşık işleyän insannar».
Metodist Svetlana Koçaş nışannadı, ani uşak başçasında sever çalışmaa.
«Bän geldim bu uşak başçasına 1994 yılda. Başladım terbiedici işlemää. Sora biz kolverdik iki grupa. Bundan sora beni teklif ettilär metodist işlemää»,- Koçaş nışannadı.
Uşak başçasının başarannarı şindän sora getirerlär burayı kendi uşaklarını. Onnar kutladılar hepsini üüretmäk kurumun 60-cı yıldönümünnän. Hepsi musaafitleri burada büük sevinmeliklär karşıladılar. Şiirleri, türküleri hem oyunnarı uşaklar barabar terbiedicilärlän hazırladılar.
