Komratta Gagauziyanın kuruluş yortusunu baktılar. 30 yıl geeri Moldova Parlamenti “Gagauz Eri özel statusu” kanonunu kabletti. Bu yılların içindä başarılar da, zorluklar da oldu. Bunun için yortuya katılannar söledilär. Bu sayıda: avtonomiyanın büünkü öndericilii, geçän yıllar onun başında bulunmuş öndercilär, avtonomiya kurulsun deyni zaamet edennär hem dä sıradan yaşayannar.
Gagauziyanın kuruluş günündä kuvetlär birliktä sıradan yaşayannarlan çiçek koydular o erdä, neredä gelecektä avtonomiya kurulsun deyni çok zaamet edennerä anmak memorialı koyulacȇk. Nedän sora GHT yortulu oturuşu başladı. Tribunadan büünkü kuvetlär hem üüsek musaafirlär Gagauz eri için söledilär, bu 30 yılın içindä yapılan işleri hem netürlü avtonomiya kendi işini ilerletsin lääzım kendi bakışlarını açıkladılar. Gagauziya başkanı E.Guţul şükür etti herbirini, kim gagauz halkın haklarını korudu hem büünnän-büün koruyȇr. O çizgiledi, ani bakmayarak zorluklara, Gagauz Eri ilerlesin deyni büük kuvet koyulacȇk.
«Moldovan hem gagauz halkları kendi arifliini gösterdilär da ayırdılar annaşmak hem dialog yolunu»,- nışannadı başkan.
GHT yortulu oturuşuna katılannar urguladılar, ani büün Gagauziyada çözülmedik problemalar var. Onnarı ensemää deyni cümnä kuvedini birleştirsin lääzım hem dä enidän kendi haklarının koruması için güreşsinnär, söledi GHT spikerı D.Konstantinov:«Bizdän kaarä bunu kimsey yapmayacȇk. Biz yarınkı günümüzü düşünelim lääzım. Biz lääzım düşünelim netürlü varlıı biz evlad boylarımıza brakacȇz».
Sölenildi Gagauziyanın gelecää için dä. Gagauziya Üüüsek nasaatın başı M.Kendigelän söleyeräk geçmiştä kalan olaylar için, urguladı: «Büünkü kuvetlär ȇkonomikanın ilelemesini ilerletsinnär lääzım. Hep ölä gagauzluu korumaa lääzım hem dä paalı kultura varlıını evlad boylarına brakmaa».
Danıştılar Gagauziyanın yaşayannarına ȇks-başkannar da: Mihail Formuzal hem İrina Vlah.
«Biz — gagauzlar, çok keret koruduk Moldovanın baamsızlıını».
«Bu kanonun baş başarısı — usluluk».
Moldova ȇks-prezidenti Vladimir Voronin Gagauziya temel kanonun kaaviletmesi için söledi.
«Benim vakıdımda biz Gagauziyanın temel kanonunu Konstituţiyada kaavilettik»,- dedi Voronin.
Türkiyenin baş konsulu Komratta çizgiledi, ani bu yılların içindä Türkiyenin hem gagauz halkının aralarında baalantılar kaavileştilär.
«Sayın başkan, paalı soydaşlar, Gagauziyanın temel statusu kanonun 30-cu yıldönümü kutlu olsun»,- nışannadı Adnan Hayal, Türkiye Genel Konsulu Komratta.
Gagauziya Başkanı E.Guţul ödülledi insannarı, ani avtonomiya kurulsun deyni hem ilerlesin deyni büük zaamet ettilär. «Gagauz Eri» ordenı ȇks-başkana Vlah İrinaya verildi. M.Çakir ordenı Kılçik Födora hem Arabadji Georgiya verildi. «Gagauziya 30-cu yıldönümü» medalisini eks-prezident Vladimir Voronin, Türkiyenin baş konsulu Komratta A.Hayal, istoriya doktoru S.Bulgar hem başkaları kablettilär. Verildi «Gagauziya 30-cu yıldönümü» medalisi «GRT-nın» çalışannarına da: Barbova Polinaya hem Maresyeva Galinaya. Gagauziyanın 30-cu yıldönümü — gurur duymaa deyni ii bir sebep — söledilär yortuya katılannar. Ama hep ölä urguladılar, ani bu ilerlemää deyni islää bir stimul.
«Gagauzlar birliktä olsunnar lääzım. Ozaman da hepsi islää olacȇk».
«Savaşacȇz yapmaa olä, ki bizim insan taa islää yaşasın».
«Gagauziyanın yaşayannarına dileerim usluluk, annaşmak, saalık. Hepsi olsun islää. Gagauziya yaşasın! İlerlesin bizim Gagauziya».
«Var olan zorlukları birliktä çözelim. İi vakıtlara etişelim».
«Bu gözäl er, neredä biz şindi bulunȇrız gösterer, ani Gagauz Erindä becererlär işlemää, ani burada sayȇrlar insannarı. İsteerim şükür etmää bizä yardım edän partnörlarımızı, dış partnörlarımızı, meţenatları»,- söledi Moldova Parlamenti deputatı A.Suhodolskiy.
«Dielerim, ki Gagauziya ilerlesin! Ko gagauzlar hepsi var olan zorlukları enseyäbilsinnär birliktä», —söledi Moldova Parlamenti deputatı V.Bolä.
«Nicä birliktä yaşadık şindiyadak moldovan, bulgar hem kalan halklarlan hep osoy da yaşayalım ileriya dooru», — söledi GHT deputatı S.Düvenji.
«En önemnisi, ani biz ilerleeriz, ani becereriz ilerlemää», — söledi çiftçilik bakanı S.İbrişim.
Avtonomiyanın artistleri şennendirdilär yortuya gelenneri.
