Kıran ayın 6-da GHT deputatları iki oturuş geçirdilär. Sırasız oturuşun süresindä deputatlar baktılar soruşu, angısı baalı 2025-ci yılın en önemni kanon proektinnän. Oturuşun süresindä Gagauziya Başkanı Guţul Evgeniya nışannadı, ani 2025-ci yılında bücet soţial harakterini koruyacek.
Bakarak 2025-ci yılın buceti kanon proektini avtonomiya Başkanı Guţul Evgeniya nışannadı, ani yılın en önemni finans dokumenti doorudulu cümneyi desteklemeyä.
«Bakannık komiteti teklif eder gelän yıl için balanslı hem defiţitsiz büceti kabletmeyä. Proektä görä gelirlär hem harçlar 1 mld. 566 mln. 306 bin 500 ley kurȇr. İsteerim çizgilemää, ani bücet proekti cümnä harakterini korudu. Nicä dä 2024-cü yılında ön plana biz koyduk cümnä proektlerin finanslanmasını , angıları yaşayannara yardım için doorudulaceklar. Biz umutlanȇrız, ani gençlär taa çok Gagauziyada kalaceklar hem duan uşakların sayısı zeedelenecek»,— nışannadı başkan Evgeniya Guţul.
Soruşu bakarkana, deputatların kimisi kendi tekliflerininnän çıktılar. HT deputatı Georgiy Kadın teklif etti yaşayannarın desteklemesini zeedeletmää , ekleyip burayı transporta harcanan finansları da.
«Siz hepsiniz bilersiniz, ne olȇr dünnedä, siz hepsiniz bilersiniz, ani energetika krizisi var. Bän teklif ederim bütün Gagauziyada benzinä hem transporta harcanan finansları almaa. Ko hepsi öndercilär , nicä Şveyţariyada biçikletalara geçsinnär, da bu paralarlan yaşayannarı suuk zamanda desteklemää»,- dedi Kadın.
Harçları azaltmaa hem Bakannık Komitetinin kimi strukturaların optimizaţiyasını geçirmää teklif etti GHT deputatı Sergey Zahariya: «Bakannık komitetinin kimi strukturalarında optimizaţiya lääzım yapmaa. Dolay administraıiyalarında var ölä görevlär, angıları Kultura, üüretmäk hem sport bakannıklarında tekrarlanȇrlar. Bu soruş pek önemni. Ozaman optimizaıiya soruşunu taa derindän yakışacek bakmaa».
2025-ci yılın bücet proektindä var Gagauziya turizm hem şarap ofisin kurulması da. Gagauziya Ekonomika hem Turizm Bakanı Larisa Çerneva nışannadı, ani bu kurum için bücettän finans lääzım olmayacek, çünkü o kendi-kendisini finanslayabilecek.
«Aazaltmaa deyni ükü bucetä, biz onu ayırı cümnä kurumu gibi yapacȇz. Orayı türlü programalar çekileceklär, investiţiyalar, hem o kendi-kendisini finanslayacek»,- söledi Larisa Çerven.
Deputat Vladimir Kıssa kolegalarının dikkatlıını çekti soruşa, angısı baalı uşak başçalarında uşakları doyurmak finanslarınınnan. O nışannadı, ani herbir küüydä bu uura verilän finanslar ayırılȇrlar.
«Bän isteerim, ki siz alasınız esaba, ani kimi uşak başçalarında bir uşaa 45 ley veriler, kimilerindä sä 33 ley. En az finans uşak başçasına Dezgincedä 30 ley hem Bucakta 33 ley. Alalım iki küüyü Kongazçii hem Bucaa ikisindä dä 75-är uşak. Kongazçıkta bir uşaa 45 ley veriler, Bucakta 33. Teklif ederim bu formulayı işletmää hem uşakları birtürlü doyurmaa»,- nışannadı Vladimir Kıssa.
Oturuşun süresindä 2025-ci yılın bücet proekti ilk okumakta kabledildi.
