Moldovanın 35 liţeyindä baş düzmäk işlerini geçirerlär. Bu üüretmäk kurumnarın sayısında Çadır kasabasının M. Çakir adına liţeyi.
15 mln. ley Dünnä bankasından, Evropa Birliindän, PROON, ÜNİSEF, Halklararası kurumnarından M. Çakir adına liţeyin düzülmesinä verildi. Proektin geliştirmesinä primariya da katılȇr, söledi primar Anatoliy Topal.
«Birkaç million ley türlü proektlerä görä hem da partnörların yardımınnan. Devletin büdcetindän, Slovakiyä devletindän People in Need kurumundan hem erindeki büdcetindän paralar verildi, angıları Mihail Çakir adına liţeyin düzülmesinä.Proekt 3 yılın süresindä geliştirilecek.Plannȇȇrız harcamaa 15 million ley. Liţey üüretmäk proţesindä örnek olacek .Bu zamandaş merkezindä uşaklar rumın,Ana dilimizdä hem başka dillerdä üüreneceklär»,— nışannadı primar.
«Şkola Model» proektinä görä Moldova devletin dolayından 35 liţey birkaç yılın içindä örnek olaceklar . Mihail Çakir adına liţeyindä çok proektlär geliştiriler. Okulun klaslarında zamadaş tedarlıkları koyulȇr.Milli proektin yardımınnan üüretmäk proţesi üüselecek – Mihail Çakir adına liţeyin başı Valentina Çebotar nışannȇȇr: «Bu proektä ilkyazdan katıldık.Yazdan çalışmaa başladık.Büük rolü bu proektä People in Need halklararası kurumun var. Onun yardımınnan pençerelär, şavklar hem yısıdılmak sisteması diiştirildi».
Remont yapılan vakıdına çoyu uşaklar onlayn rejimında üürenerlär,küçük yaşta ürenicilär-okulda. Buna görä kimi klasları yısıdȇrlar. «Educația pentru sănătate» — taa bir proekt, angısı liţeydä geliştiriler. Düzüldü hem donnandı mediţina ,psihologiya hem üürenmäk kabinetleri, söleer liţeyin başı Valentina Çebotar.
«Rumıniya elçiliin yardımınnan 3 klass düzüldü.Kiyatlar hem lääzımnı tedarlıklar verildi.İlkyaza bibliotekada remont yapılcek . Biologiya,himiya,fizika,matematika kabinetlerdä bu iş olacek»,- dedi direktor.
Çoyu proektlär regional hem erindeki bücetindän hem da Halklar arası kurumnarın yardımınnan yapıldılar, nışannȇȇr liţeyin başı Valentina Çebotar: «Bizim liţey yakın 40 yıl çalışȇr.Bu vakıdın süresındä bukadar büük işlär olmadı.İnanȇrız, ani bu diişmeklerdän sora üüretmäk proţesi üüselecek».
M. Çakir adına liţeindä 450 uşak üürener.Moldova ministerliin yardımınnan kurumda üüretim proţesi devletin dilindä gider.
