«GRT» CK danıştı Komrat kasabası yaşayanı , ki biz yardımcı olalım ona açıklamaa problemayı, angısı baalı evlerin yanında bulunan erin primȇriyaylan satmasınınnan.
Komrat kasabasının primariyası neetlener çıkarmaa aukţiona erleri, angılarda bulunȇrlar Komrat Gagalaţan adına sokaanda bulunan evlerin damları, açıkladı Komrat kasabası yaşayanı Elena Susan. Bu soruşa görä 2025-ci yılın mardın 10-dan Apäeläţiya Palatanın kararı var.
«Bu evlerin yanında, herbir kvartiranın kendi damı var. Bu erlär verildilär yaşayannara taa ozaman, açan onnar kvartiraları kablettilär. Apeläţiya palatanın kararına görä primȇrıya lääzım versin bizä bu erleri, amma primȇriya bunu yapmaa istemeer»,- açıkladı Komrat kasabası yaşayanı Elena Susan.
Primȇriyanın İuridik soruşları uzmanı Tatyana Novak nışannadı, ani bu soruş aukţion komissiyasına bakılmaya verilmedi, çünkü kasaba nasaatın oturuşundan geçmedi.
«Bän aukţiona çıkarȇrım sade nasaatlan kabledilän kararları, bu er için nasaatın kararı yok. oturuşta kvorum yoktu hem soruş bakılmadı. Bunun için bizim yok hakkımız satılaa çıkarmaa bu erleri, onnar aukţionda olmayaceklar»,- Tatyana Novak nışannadı.
Soruşu çözmää deyni yaşayannar birkaç sıra daava kurumnarına danıştılar. Kaul Apeläţiya palatası da karar verdi.
«Galaţana sokaanda bulunan 11,13, hem 15 nomerlerindä evlerin uurunda bulunan erlerin sınırlarını belli etmäk hem kadastr materialların Komrat pri̇mȇri̇yasınınnan imzalansınnar lääzım. Bundan kaarä onnar genel reestrında da bu erleri sayıya koysunar lääzım»,- Kaul Apeläçıya palatasının çıkışında haberlener.
Bu soruşa görä komentariya Primar yardımcısı Stepan Kara verdi.
«Bän bileerim bu problemayı, orada problema yok. Taa açın bän nasaatçıydım, biz verdik seslerimizi onun için, ani bu erleri primȇriya yaşayannara versin. Bilmeerim kim bu insannarı kızıştırȇr orada, ama orada kanon bakılȇr. Kimisinin hakları orada basılmȇȇr»,- Stepan Kara dedi.
Eеr, neredä bulunȇrlar bu damnar primȇriyanın vaarlıı sayılȇr, hem var nicä verilsin yaşayannara sade kanona görä, nışannadı Stepan Kara: «Kasabada biz sade kanona görä işleeriz. İnsannar isteerlär, ani biz parasız onnara toprak vererlim, amma biz parasız birinä bişey yok nicä vereelim. Eеr ya satılȇr, yada kiralaa veriler. Başka kolaylık yok. Parasız biz birinä, bişey vermeeriz».
GRT CK ieeri dooru da durumu gözledecek.
Moldovanın hem Gagauziyanın en mekalı haberleri GRTnın Telegram kanalında!