Valontörlar evsiz hayvannarın priyutundan, angısı Komratta bulunȇr, danıştılar yaşayannara barabar durgutmaa hayvannarın zeetlemesini. Bu iş için haberledi hayvannarı koruması volontöru Alla Hudoba.
«İstäärdim annatmaa bir olay için, angısı diil çoktan Paskelleya karşı oldu kasabamızın bir dolayında. Kukuruznıyda kimsä daattı otravayı öldürmää deyni evsiz hayvannarı,açan kimsä hazırlanȇr gözäl açık yortuya, kimsä öldürer. Bu yortuda lääzım iilik yapmaa, ama başka türlü çıkȇr, isteerlär öldürmää onnarı, kim zeet çeker bu dünnedä»,- haberledi hayvannarı koruması volontöru Alla Hudoba.
Alla Hudoba urgulȇȇr, ani hergün zorlatmak olaylardan zeet çekerlär nicä evsiz hayvannar ölä ev hayvannarı da.
«Kasabanın sokaklarında evsiz köpekleri hem kedileri zihirleerlär, patladȇrlar, keserlär ayaklarını, düyerlär hem da maşinalarlan urȇrlar sora brakıp yolda ölmää, giderlär. İsteeriz sölemää, ani Komrat gübür poligona getirerlär köpekleri da orada sıbıdȇrlar. Ama kimi avcılar, gelip orayı, patladȇrlar hayvannara dooru. Bölä olaylardan sora volontörlar topladılar iki paket patron hem da bulmadılar bir da diri hayvan, angısına yardım lääzım»,- Hudoba urgulȇȇr.
En önemni problema hayvannarın zeetlemesindä o, ani yok cezalamak hem cümnä tarafından maana bulmaklar, sayȇr Alla Hudoba: «Bizim cümnemizdä sayılȇr, ani doyurmaa evsiz hayvanı bu diil normal, bu problema da maana bulȇrlar, ama urmaa kolamaa yada öldürmää hayvanı bu sırayca bir iş. Biz sayȇrız, ani diil lääzım bu işleri bölä brakmaa da gözleri kapamaa hayvannarın zeetlemesinä. Biz danışȇrız hepsinä olsunnar taa cana yakın hayvannara, neçinki onnarın yaşaması ölä da zor insanın beterinä».
Büünkü gün evsiz hayvannar için priyutta 150 köpek var, angılarına volontörlar çorbacıyı aarȇrlar. Çekimneri yaparkana priyuda geldi Başkaliya küüyün yaşayanı. O istedi iki köpek almaa.
«İsteerim almaa evä köpek. Bendä yok köpek. İşittim, ani burada var nasıl almaa bir hayvan. Eer onnar küçüksäydi, ozaman var nicä iki da almaa. Bän taa ileri geldiydim, söledilär taa sora geleyim. Bendä vardı köpek, ama onu maşına çiinedi»,- dedi Ilyä.
Volontörlar urgulȇȇrlar, eer insan istärsäydi raatlıkta yaşamaa, neredä yaşamak en paalı bir iştir, onnar hayvannarı da baksınnar lääzım.
Moldovanın hem Gagauziyanın en mekalı haberleri GRTnın Telegram kanalında!