V dünnäarası pedagogika forumu, angısı Gagauziyada geçti, topladı 700 pay alacıyı 10 devlettän, angılar kayıl oldular bölä olaya katılmaa. Forum oldu diil sade er, neredä becermeklärlän diişerlär, ama eni ideyaların erinnän, angıları yardım ederlär üüretmäk sistemasını diiştirmää.
Dünnäarası pedagogika forumun teması «Üüretim sistemasının ilerlemesi zamandaş koşullarda- üüretim bölümün stimullu durumu». Bu unikal bir meydan, angısı birleştirer üüredicileri, ekspertleri hem üüretim uurunda liderleri açıklamaa zamandaş kolaylıkları. Üüretim uuru, angısında bulunȇrlar üüredicilär hem üürenicilär lääzım stimullu olsun, onda biz üüreneriz hem üürederiz. Da o lääzım uygun, komfort, zamandaş olsun, söledi Gagauizyanın üüretim bakanı Natalya Kristeva: «Büün neyro akılı yapȇr analiz haberlerä, ki türlü hastalıkları belli etmää, 3D tiparı kullanılȇr, ki protezleri hem implantları kurmaa. Şkola lääzım hazırlasın uşakları gelecek zamanına, neredä önemni olsunnar barabar çalışmasında becermeklär, kritika düşünmesi, kreativ hem ţifra uurunda bilgileri. Lääzım kurulsun zamandaş üüretim durumu, angısı verecek kolaylık uşaklara bilgileri kabletmää. Önemni sormaa üürenicilerdä ne onnara meraklı, ne onnara lääzım hem ne onnar bekleerlär üüretim proţesindän».
Bu forum er, neredä üüredicilär var nasıl diil sade kendi becermeklerinnän paylaşsınnar, ama işlettirsinnär eni kolaylıkları üüretim proţesin modernizaţiyası için, nışannadı KDU rektoru Sergey Zahariya.
«Stimullu üüretim bölümü o diil sade konţepţiya, o temel, angısında erleşili bizim, üürenicilerin, studentlerin başarları. Büün biz annȇȇrız, ani üüretim o diil sade bilgilerin verilmesi, ama koşulların da kurması, ki herbir üürenicinin özelliklerini belli etmää. Önemni üüretmää uşaa düşünmää, duymaa hem da o istesin yaratmaa hem kendi kuvedinä inansın»,- dedi Zahariya.
Dünnäarası pedagogika forumu – o adım ilerlemeyä hem evlad boylarımıza kurmaa ii koşulları, urguladı kendi sözündä Gagauziya başkanı Evgeniya Guţul.
Zamandaş tehnologiyaların kullanması, üüretmek kalitesinin üüseltmesi, üüredicinin rolü üürenicilerin kritika düşünmeklerin ilerlemesindä. Bu temaları açıkladılar ekspertlär pedagogika forumun süresindä. Hep ölä onnar annattılar aspektlär için zamandaş üüretim bölümündä. Forumda vardı zona, neredä temsil edildilär üüretim hem didaktika proyektleri, angılarını başarılı kullanȇrlar üüretmäk proţesindä.
«Bu yıl pek meraklı, türlü meydannar var. Biz göreriz, ani her yıl eniliklär peydalanȇr. Pek beendim. Beenerim, ani Gagauziya dooru yoldan gider da tehnologiyalar bizim şkolalarımıza gelerlär».
«Açan oldu ilk forum biz hiç bilmäzdik nicä o olacȇk, ama sora beendik bu olayı. Bendä şansora 4 statya var, angılarını yazdım. Yardımcı oldu üüretim bakannıı. Da hepsi oldu».
Faydalı üüretmäk hem üürenicilerin özel ilerlemesi verer gençlerä kolaylık taa ii becermekleri kabletmää hem kullanmaa, sayȇrlar üüredicilär. Mihay Eminesku adına liţeyin informatika üüredicisi Dmitriy Morar söleer, ani zamandaş tehnologiyaları kullanȇr, nicä uşakların şennendirmesindä, ölä üüretim proţesindä dä.
«Var çok eklemelär hem videolar, angıları yardım ederlär geografiya, biologiya hem matematika uroklarını taa meraklı yapmaa hem başka formatta onnarı götürmää.Var nicä hepsini bakmaa hem diil real dünneya girmää»,- söledi Dmitriy Morar.
Dünnäarası pedagogika forumu doorulu ona, ki onun pay alannarı eni bilgileri, ideyaları kabletsinnär da onnarı kendi işindä kullansınnar, nışannȇrlar kurucular.