Komratta gimnastika sport klubu bir yıldan zeedä işleer da hazırlêêr uşakları üüsek uurda, onnar ödülleri kazanêrlar Moldova Respublika Çempionatlarında. Birkaç ay geeri bölä sport klubu Taraklıda da açıldı.
Tarakliyada uşaklar üç yaşından başlêêrlar gimnastikayı üürenmää. Küçük sportçular diil sade genel elementleri üürenerlär, ama olêrlar taa kaavi, gözäl hem kıvrak.Uşaklar söleerlär, ani büük havezlän gelerlär burayı.
«Bän isteerim gimnastikaya üürenmää, isteerim trener bu uurda olmaa. Küçüktän isteyärdim, pek severim bu işi. Kimär keret zor olêr».
«Bän pek severim nicä biz çalışêrız, bizim elementleri.Var nezaman zor da».
«Gimnastikada ileri var nicä gitmää, taa sigur olmaa. Severim Rina Averinayı. Severim şpagat hem ţirkul».
Analar sevinerlär,ani uşakların var kolaylıı burayı gelmää da ilerletmää kendi becermeklerini.
«Gördüm, nicä uşak bakardı türlü video gimnastikada, sora savaşardı yapmaa onnarın. Annadım, ani sever bu işi. Şükür ederim Anna Leonidovnayı, ani açtı bu klubu, treneri, ani geler bizim uşaklarımız için».
Getirdi Gagauziyaya gimnastikayı direktor hem klubun baş treneri Anna Kudreţ. O nışannadı,ani Tarakliyadan analar danıştılar, ki burada da açılsın filial.
«Bizä gelerlär Novosölovkadan, Kazayaktan, Kıpçaktan. Tarakliya merkez, ama uşakları analar getirerlär başka erdän dä. Uşaklar islää, becerikli. Yok prost uşak. Severiz onnarı pek. İslää,ani Tarakliyada pek ii trener, gimnastika sport masteri»,- baş trener Anna Kudreţ söleer.
Profesional trener Ukrainadan Viktoriya Kasyanova söledi, ani bu sportta önemli gelmää da çalışmaa, ozaman olacek üüsek başarlar.
«Tarakliya için bu eni, insannarı lääzım üüretmää. Bu ilk, ne var burada kızlara deyni. Sanêrım, ani gelän festivallerdä uşaklar göstereceklär ii başarları, hepsi olacek onnarda nicä lääzım»,- Viktoriya Kasyanova söledi.
Komrat sport klubun gimnastları aldılar ödülleri Moldova çempionatında, angısı geçti dekabrinin 7-8. Şindi sa dekabrinin 21-dä Komratta olacek sport olayı, neredä pay alaceklar 180 gimnastikacı Gagauziyadan, Taraklıdan hem Borogandan.
Avtor: A. Karapirä, operator hem montaj: Leonid Arfanos