Gagauzların millet kufnesinin simvolların birisi gözlemä sayılȇr, angısını hamurdan türlü içendikilärlän hazırlȇȇrlar. Onun reţepti boydan-boya geçer. Master-klası, nicä iişimiklän gözlemeleri hazırlanmaa 4 А klasına deyni G. Gaydarjı adına liţeyindän Komratlıyka Mariya Arnaut geçirdi.
Gagauz gözlemelerin kokusu 4 А klasını G. Gaydarjı adına liţeyindän bir masaya topladı. Gözlemä gagauzlarda – musaafirlik simvolu. O aylä uygunnuunu hem senseläylän baalantıyı gösterer, söleer Komradın yaşayanı Mariya Arnaut. Bu neetlän – uşaklara göstermää hem annatmaa, kendi evindä master-klas millet imenin hazırlanmasında geçirildi.
«Biraz geç kaldık, bu işleri taa ileridän läzzım uşakları üüretmää, ki halk imeklerini bilsinnär. Gözlemä bilärkenä yapmaa, insan aaç kalmayacek».
«Uşaklar yazdılar,doldurdular, pişirdilär gözlemeleri. Pek önemli kendi halkın tradiţiyalarını bilmää hem uşaklarımıza vermää».
Gagauz gözlemelerin hazırlanması hamurdan çekeder, angısını incä pazılara yazȇrlar, sora içini doldurȇrlar da kenarlarını yapıştırȇrlar. Da te gözlemä pişmää hazır. Onu kızdırılmış oloya kolvererlär, neredä hemen kızarȇr.
Uşakların gelmesi için, malilär Mariya Arnaut hem Praskovya Bratunova hamuru, gözlemelerin içindeliini hem herbir küçük aşçıya deyni çalışmak erini hazırlamışlar.
«Büün master klasta bizi üürettilär dooru gözlemeleri hazırlamaa. Hepsindä da olmadı, zerä seftä yaptık. Bu büük zameet».
«Bendä hamuru yaymaa oldu, kapamaa ama pek olmadı, iişimik gözlemedän çıkardı».
Millet imesini uşaklar gagauz odasında yaptılar, angısını kendi evindä Mariya Arnaut musaafirlär için hazırladı. Uşakları çalışmak için çemberlär hem fıtalar beklärdilär.
«Bizä fıtacıkları hem çemberleri hazırlamışlar hem hemen baaladılar. Kufnedä karılar, kızlar dartılı başlan hem fıtaylan lääzım işlesinnär».
Praktika gözlemelerin yapmasında unudulmaz duyguları diil sade uşaklarda, ama analarda da brakacek.
«Kısmetliyim bölä käämil duygulardan, bu oluş uşakları birleştirdi, millet ruhunu kaaviletti hem nicä kayınnam söledi, becermeklär uşaklara yaşamkta lääzım olceklar».
Master-klasın kurucuları söleerlär, ani bölä akılda kalmaklar evlad boylarını toplȇȇrlar hem aylä tradiţiyalarını ilerlederlär.
Moldovanın hem Gagauziyanın en mekalı haberleri GRTnın Telegram kanalında!