Gagauziya Başkanı Evgeniya Guţul Çadır-Lunda uşak sport şkolasında bulundu, hem burada geçirilän baseyn düzüntücülük işlerininnän tanıştı.
V.Potapov adına Çadır-Lunga Uşak sport okulun baseynında düzüntücülük işleri 45 yıldan zeedä geçirilmedilär. Bu yıl gagauziya bücetindän bu uura 600 bin ley verildi, nışannadı Gagauziya Başkanı Evgeniya Guţul.
«Biz büün bulunȇrız sport şkolasında, burada büün yapılȇr havuz, angısı çok yıllar işlämerdi hem uşaklara yoktu neredä üzmää. İspolkomdan bu uura verildi 600 bin leydän zeedä, ki bizim uşaklarımız gelsinnär da zanaatlansınnar sportlan. Biz herzaman yardımcı olacez, ani bizim uşaklarda herzaman olsun islää er, neredä onnar saalıklı geçireceklär kendi vakıtlarını hem çok önemni, ani uşaklar zarar duymasınnar kendi güüdelerinä»,- açıkladı başkan.
Düzüntücülük işlerini gerçekläärken, belli oldular başka önemni problemalar da, angıları uzmannarlan açıklandılar, büün baseynın düzülmesi sonuna yaklaşȇr, nışannadı V.Potapov adına Çadır-Lunga Uşak sport okulun başı Andrey Lazarev.
«Baseynı düzmää pek lääzımdı. Burada remont 45 yıldan zeedä yapılmadı hem o büünkü istediklerä uymazdı. Şindi işlär başarılȇrlar. Koyulȇrlar suyu paklamak sistemaları da oktäbrinin sonunadan baseyn işlemää başlayacek»,- çizgiledi Lazarev.
Regionun finans yardımınnan 21-ci yılda düzüntücülük işleri yapıldılar kurumun büük salonunda da.
«Uşaklar severlär pak hem gözäl salonda işlemää. Remonttan sora uşak sayımız zeedelendi»,- nışannadı Andrey Lazarev.
Regional kuvetleri sport ilerlemesinä bitki yıllarda büük dikkatlık vererlär, hem bu iş yok nicä sevindirmesin nışannadı Gagauziya Boks Federaţiyası başı Dmitriy Çakusta.
«Siz bilersiniz mi, o baseyn burada vardı, ama o biraz eskilendi, bataklandı, çünkü orada su herzaman vardı. Onu enilettilär, biraz taa derin yaptılar. Ama, ani para geldi Bakannık komitetindän, biz buna sade mutlu olȇrız»,- dedi Çakusta.
V.Potapov adına Uşak sport okulunda sportlan büün 100 uşak Çadır-Lungadan zanaatlanȇrlar. Onnardan kaarä 350 uşak okulun başka 8 filialında da.
Avtor: A.Terzi, operator: V.Kıssa, montaj: M.Kazaku.