Komratta geçti Komrat kuboona halklararası serbest güreşmesi turniri . Yarışmalarda pay aldı 25 komanda bütün Moldovadan hem hep ölä pay aldılar sportçular Poyraz Kıbrıstan, Türkiyedän, Rumıniyadan, Ukrainadan , Bulgariyadan. Kim oldu çempion hem kazandı kuboo, annadȇr bizim korrespondentımız.
Devletin herbir dolayından hem aşırı devletlerdän sportçular güreştilär iki matta Komrat kuboo için. Yarışmalar geçtilär regional stadionun sport zalasında. Olayın açılışında musaafirlär nışannadılar, ani yarışmalar birleştirerlär uşakları hem vererlär kolaylık göstermää kendi ustalıını.
«Burada uşaklar hertürlü yaşta güreşerlär, biz sizinnän göreriz meraklı güreşi, da üülen tarafında, açan geçerlär bölä yortular, biz sevineriz, ani bizdä var potenţial»,- dedi Güreş federaţiyası viţe-başı Valeriy Zabolotnıy.
Komrat muniţipal sport okulu başı Gavriil Tulba nışannadı, ani her yıl bu yarışmalara geler taa çok pay alan, angıları isteerlär güreşmää hem göstermää üüsek uurda kendi ustalıını.
«Matta biz göreriz meraklı düüşleri, bizim sportçular hem başka devletlerdän da kaavi güreşerlär, yaklaşȇrız finala, neredä güreşlär geçerlär taa kaavi ilk, ikinci hem üçüncü erlär için»,- Gavriil Tulba nışannadı.
Komrat miniţipiyanın primarı nışannadı, ani bölä olayların geçirmesi verer stimul uşaklara gitmää ileri, güreşmää hem tutturmaa kendi ustalıını matta.
«Bölä pay alannarın sayısı bizä verer stimul ileri dooru da geçirmää bölä yarışmaları taa sık, hem saa ol Türkiye partnörlarına, ani yardım ettilär bu zalı düzmää»,- dedi primar Sergey Anastasov.
Musaafirlär aşırı devletlerdän nışannadılar gagauzların sıcak karşılamalarını hem urguladılar , ani bölä uurda yarışmalar vererlär kolaylık kaavileştirmää baalantıları hem paylaşmaa becermeklärlän.
«Uur pek üüsek, yarışmalar ii geçerlär, her yıl geleriz Tarakliyaya, Kişinöva, Komrada. Onnar bizim dostlarımız. Bu haliz yortu bizä deyni»,- nışannadı Salim Naim «Dimitrovgrad» klubu baş treneri.
«Önce burayı davet ettinän büük onur duyoruz, ayne şekilde biz dä sizde gurur duyoruz. Çok memnunuz, ani burada bulunȇrız»,- nışannadı Yavuz Çiftçi milli takımı treneri, Kıbrıstan.
Sportçuların trenerleri hep ölä urguladılar yarışmaların üüsek geçirmäk uurunu hem nışannadılar, ani güreşmäk iki matta meraklıydı hem kızgındı, konkurenţiya da da kaaviydi.
«İsteerim sölemää, ani yarışmalar geçerlär üüsek uurda, en çok beni sevindirdi güreşin ilerlemesi, bu yarışmalarda çok uşak pay aldı. Beni herkeret dalgalandırȇr, açan çok uşak pay alȇr sport yarışmalarında»,- nışannadı Valeriy Kuzneţov, serbest güreşmesi treneri
«Burada toplandılar üüsek uurda güreşçilär, angıları pay aldılar Moldova çempionatında da, onun için uur pek üüsek»,- açıkladı Vladimir Deliçeban, serbest güreşmesi treneri.
Güreş matlarda pek kızgındı, kimsey uşaklardan istemäzdi kalmaa aşaa, herbiri savaşardı ensemää kendi konkurentını da getirmää komandaya ödül.
«Bän güreştim bir güreş, konkurenţiya iidi, bän taradım».
«Bütündän güreş gider ii, uşaklar göstererlär kendi becermeklerini matta. Hepsi ii gider».
Yarışmaların çıkışlarına görä hepsi tarayıcılar kablettilär diplomaları, ödülleri hem kubokları. Baş kuboo kendi aralarında komandalar payettilär. Kazandı onu çıkışlara görä Komrat komandası, ikinci erdä Kişinöv komandası, hem üçüncü erdä Kagul sportçuları.
Moldovanın hem Gagauziyanın en mekalı haberleri GRTnın Telegram kanalında!