Rusen Universitetin üüredicileri Bulgariadan biçikleta marafonunu geçirdilär. Adalı oldu o üüretim kurumun 80-ci yıldönümünä. Onnar bulundular Silistra, Razgrad, Vidine hem Taraklı filiallarında. Nicä onnarı Tarakliya kasabasında karşıladıkar, açıklȇȇr Anna Karapirä.
İlk keret universitetin istoriyasında profesorlar geçtilär 100-län kilometra biçikletalarda, ki nışannamaa universitet aylesinin birliini hem nekadar önemni halklararası baalantılar. Onnar bulundular Taraklı universitetindä, angısı bu yıl oldu Rusen universitetin taa bir filialı. Burada marafonun pay alannarını tuzlan ekmeklän hem bulgar oyunnarınnan kaarşıladılar.
«Biz Rusedan çıktık, ilk filial oldu Razgradta, sora biz Silistraya etiştik — büün Taraklıdayız. Biz pek beendik burasını. Benim kolegam, Pavel Petrov, angısı hazırladı bu marafonu dedi, ani pek isteer ki üüretim yılı başlasın da biz burada üüredelim studentları»,- söledi Galina Leçeva, Silistra filialın literatura uurunda üüredicisi.
Musaafirlär tanıştılar Taraklı filialın üüretim hem Kultura yaşamasınnan, universitetin muzeyindä bulundular hep ölä da diktilär bir fidancık — nicä bir simvol Bulgariya hem Moldova devletlerin arasında.
«Onnar ilk keret burada, Moldovada. Pek önemni, ani geldilär musaafirlär Tarakliya filialına da… Biz pek sevineriz bölä iniţiativaya, o pek meraklı, neçinki lääzım olsun kuvet hem saalık ki geçmää bukadar kilometra biçikletalarda, yazın bloc sıcakta, onnar yaptılar bunu da etiştilär»,- dedi Aleksandr Borimeçkova,Taraklıda Rusen universitetin filialın administrativ direktoru.
Hep ölä Taraklı filialın administrativ direktoru Aleksandr Borimeçkov marafonun hepsi pay alannarına birär medali verdi.Nişannandı, ani bölä iniţiativalar taa kaavi yapêrlar halklararası iş birliini.
Avtor: A. Karapirä, operator hem montaj: L. Arfonos
Moldovanın hem Gagauziyanın en mekalı haberleri GRTnın Telegram kanalında!