S.Kuroglo adına gi̇mnazi̇yasında Paskellä festivali geçti. Festival birleştirdi üürenicileri , üüredicileri hem musaafirleri Gagauziyanın herbir dolayından. Onda pay aldılar incazanaat kolektivleri, din adamnarı hem Gagauziya Üüretim bakannıın temsilcileri.
Paskellä festivali birleşmäk hem ruh birlii simvolu oldu, nışannadı Gagauziya Üüretmäk bakannıın dilleri ilerletmäk bölümün başı Mariya Uzun. Onun laflarına görä bölä yortular üürenicileri, üüredicileri, ana-bobaları birleştirerlär hem yardım ederlär kaaviletmää dostluk, ruh zenginnikleri duygularını.
«Bu gün burayı toplandılar gagauzlar, gagauz uşakları, angıları göstereceklär kendi sevgisini bu ayozlu yortuya- Paskellä yortusuna. Bu gün bizim uşacıklarımız göstereceklär, nicä onnar gözäl çalȇrlar türküleri , oynȇȇrlar hem bizim ayozlu dilimizä saygı göstereceklär, annadarak Paskellä yortusu için»,- nışannadı Mariya Uzun, Gagauziya Üüretmäk bakannıın dilleri ilerletmäk bölümün başı.
Komrat kasabası Ayoz İlyä adına klisenin izmetçisi boba Födor ruh tarafından olayın önemini nışannadı. O nışannadı, ani zamandaş dünnedä pek önemni annatmaa uşaklara hem gençlerä annaşmak hem sevgi zenginnikleri için. Onun laflarına görä bölä festivallär yardım ederlär korumaa ruh zenginniklerini hem evladlara onnarı etiştirmää.
«Büünkü gündä biz toplandık bu okulda, neredä uşaklar göstererlär bir konţert Hristosun ölülerdän dirilmesi için. Çok erdä bizim uşaklar üürenerlär, çok erlerdä göstererlär türlü konţertleri , angıları baalı Hristosun Paskellesinnän hem uşaklar annadȇrlar türlü şiirlär hem çalȇrlar türlü türküleri, annadȇrlar Evangileyenin te o ürrenmesini, angısını bizä üüreder klisä»,- boba Födor nışannadı.
S.Kuroglo adına gimnaziyanın başın yardımcısı Vera Arakelän nışannadı, ani uşaklar da, üüredicilär dä büük havezlän bu festivalä hazırlandılar. Uşaklar bu yortuyu büük havezlän bekledilär. Vera Arakelän nışannadı, ani festivalin geçirilmesi üürenmäk kurumun gözäl adeti şansora oldu.
«Bän isteerim kutlamaa hepsi pay alannarı hem Gagauziya yaşayannarını bu büük hristian yortusunnan. Dileerim hepsinä saalık, kısmet, uygunnuk hem uzun ömür».
Festivaldä pay aldı 18 kolektiv bütün avtonomiyadan.
Avtorlar: O.Lodka, A.Terzi, operator: G.Stavilov, montaj: İ.Rezuneţ
Moldovanın hem Gagauziyanın en mekalı haberleri GRTnın Telegram kanalında!