Moldovada geçer haberlemäk kampaniyası «Statistikanın payı olma,  yortuları olaysız geçir».

İnternȇt tükennerindän satın alarkana yalancıların kurbanı olmamaa deyni lääzım mutlaka saytı kontrol etmää. Marketlarda bişey satın alarkana kasa çeklarını lääzım toplamaa, söleer poliţiya çalışannarı.

«Lääzım uzak durmaa şüpelendirän kompaniyalardan, saa – sola kendi kişi bilgilerini vermemää, poçta kutusunda komunal izmetlär için kvitanţiyaları brakmamaa, korumaa kendi varlıını, yol kurallarına uymaa»,  — nışannadı poliţiya komisarı Natalya Grıu-Yakimova.

Poliţiya Bakannıında analara – bobalara danışȇrlar türlü saytlara girän uşaklarını kontrol etsinnär. Cümne erlerindä, neredä yasak ediler tütün içmää, kanon kuralları bakılsınnar.

Gagauziyanın Hatalı olaylarda Bakanıı vatandaşlara nasaat eder yateşä karşı korkunçsuz kurallarına uysunnar. En ilk ta kurallar, ne baalı sobalarlan.

«Sobalar lääzım kontrol edilsinnär taa başlamadaan yakmaa onnarı, bacalar lääzım pak osun. Sobayı yakarkana lääzım onun yanında bulunmaa», — nışanadı Gagauziya Hatalı olaylarda Bakanıı izmetin başı Stanislav Slesarçuk.

Haberlemäk kampaniyasının çerçevesindä poliţiya hem Hatalı olaylarda Bakanıı yaşayannara bukletları daadȇrlar. «Statistikanın payı olma,  yortuları olaysız geçir» kampaniyası Moldovada bütün yanvar ayı ilerleyecek.