Kasım ayın 24-27 Avstriya Graţ kasabasında estetika gimnastikasının Dünnä çempionatın son etapı geçti. Orada Gagauziyadan gimnastikacılarımız da pay aldı.
Moldovanın Gloriya estetika gimnastikasının milli komandasına Komrattakı gimnastika klubun uşakları girdi.
«Dünnä çempionatında çok türlü takımnar pay almaa geldilär. Takımnarın sportçuları kaavi. Türlü kategoriyalara görä yarışmalar geçti. Bizim kızlar korkardılar. Onnarın yaşında 8 takım vardı: Meksika, İtalya, Finländya, Estonya. Bu devletlerdän pek kaavi gimnastikacılar», — haberledı estetika gimnastikası trenerı Kristina Sari.
Gagauz gimnastikacıları seftä Dünnä çempionatında pay aldılar. Onnar üüsek becermeklerini gösterdilär. Hepsi pay alannarın arasından Moldovanın takımı gümüş medaliyi kazandı.
«Çempionatta biz gördük dünnedä anılmış hepsi takımnarı. Taa ileri biz onnarı sade televizionda görärdik . Biz herzaman istärdik onnar gibi olmaa», — paylaştı Dünnä çempionatın gümüş medaliyi kazanan Viktoriya Kıssa.
«İi kendimizi gösterdik. Hepsi islää geçti. Korkardık, ani nesaydı olmayacȇk, ama mutlu kaldık. Avstriyada çempionat üüsek uurda geçti. Kendi becermeklerimi gösterdim. Beendim nicä geçti», — annattı Dünnä çempionatın gümüş medaliyi kazanan Evelina Derevçuk.
Estetika gimnastika bölümü Komratta açıldı açan Yaradıclık Evi kurumu eni binaya geçti. Büün gimnastikaya 120 uşak beş yaşından geler.
