Gagauziyada 2018-ci yılda beeri başladılar kutlamaa kultura izmetçilerinin zanaat gününü. O koyuldu hederlez ayın 27-nä — anılmış yazıcının, ilk gagauz istoriya hem etnografiya muzeyin kurucusunun Dmitriy Karaçobanın duumaa günündä.
Büün yortulu oluşta bir zala toplandılar türküclär, oyuncular, resimcilär, aktörlar, biblioteka çalışannarı, ki kutlamaa kultura çalışannarın gününü.
«Siz Gagauziyanın kulturasını eni kaliteli uura kaldırȇrsınız. Hergün çalışȇrsınız, ki bakmayarak hepsi karşı gelän zorluklara bizim halk hepsini enseyecek», danıştı kollegalarına Gagauziya kultura Bakannıın başı Marina Semönova.
«Kultura bizim devletimizdä büük rolü oynȇȇr hem önemli daavayı çözer — birleştirer Moldovanın herbir milletini bir bütün dostlu halka», — nışannadı kultura bakanı.
Kultura izmetçilerini kutladı Gagauziyanın başkanı İrina Vlah.
«Büün bu zenginnikleri terbitmää dünnedä zor, ama siz ii bu daavayı aslıya çıkarȇrsınız. Bütün ürektän sizi kutlȇȇrım zanaat yortunuzlan. Şükür, ani siz varsınız, seversiniz zanaatınızı hem missiyanızı doru yoldan götürersiniz», — söledi başkan.
Moldova kultura ministrusu Sergey Prodan premiyalan hem şannı gramotaylan Moldovanın kultura ministirliindän baaşladı «Düz-ava» ansamblisinin türkücüsünü İrina Poydolovayı, Komradın muzika okulun başını Dmitriy Timofeyi hem kultura Bakannıın uzmanını Elena Sarıyı.
«Halkın kultura vaarlıı diil sade onda, neyi biz kablettik bizim dedelerimizdän, ama te o, ne biz kendi evlatlarımıza verecez. Onuştan da büük daava önümüzdä var korumaa, ilerletmää hem gagauz dilindä lafetmää. Sade ozaman gagauzlar kendi halkını koruyacȇklar», — nışannadı Sergey Prodan.
Moldova Parlamentin deputatı İvanna Köksal kutladı kultura çalışannarını zanaat yortsunnan.
«Biz bir dä gün sizsiz hiç yaşayamayacez. Te neylän siz zanaatlanȇrsınız bizi mutlu yapȇr. Biz bütün ürektän sizi kutlȇȇrız. Sizin işiniz belli, biz onu göreriz. Hodul duyȇrız, ani siz varsınız», — söledi İvanna Köksal.
Oluşun süresindä en ii kultura izmetçilerini nışannadılar gramotalarlan.
Haberin fotosu İrina Vlahın facebook sayfasından alındı
