Yașamakta bölä olêr, ani insan ihtiarlıkta yalnız kalêr, kendibaşına zorlarınnan, kahırlarınnan hem düşünmeklerinnӓn. Bakmayarak ona, ani herkezindӓ yalnızlık için kendi sebepleri var, her biri onnardan isteerlӓr onnarı annasınnar, hatır güütsünnӓr hem saygı göstersinnär. “Yardım eli” cümnӓ kurumun başı Elena Akbaş kutladı Komradın yaşlı yaşayannarını Paskellӓ yortularınnan. Yalnızlıkta bulunan  hem kolaylıksız ihtiarlar kablettilӓr imelärlän poşetları.

85 yaşında Komratlıyka İvanna Revaţkaya — kolaylıksız yaşayan. O kabletti baaşışları “Yardım eli” kurumundan. Karı artık birkaç yıl yalnız yaşȇȇr. Cümnӓ kurumundan dikatlık hem saygı ona deyni paalı.

İvan hem Svetlana Kalpakçi  yaşamalarının taa çoyu payını işledilӓr okulda. İvan Nikolaeviç  hem  Svetlana Alekseevna üüredicilär. Onnar birkaç yıl sıravardı yalnız yaşêêrlar. Pensiya sayısı ikisinӓ kurêr 4 bin ley. Elena Akbaş çoktan bileer Kalpakçi aylesini, varkana vakıdı dolaşêr ihtiarları.

“Zor, ama yok ne yapmaa. Kimӓr kerӓ komuşumuzu çaarêrız, alsın ekmek bizӓ. Çok saa olsun Lena, ani unutmêêr bizi”,- söledi İvan Kalpakçi.

Paskellӓ akţiyası geçiriler ihtiarlara deyni. “Yardım eli” Cümnӓ kurumu hazırladı yortulu masayı hazır imeklärlän da. Pakettä var vinegret salatası, yaanıylan kartofi, dolma, meyvalar, kolaçlar, ekmek hem boyanmış yımırta. 2 günün süresindӓ 60 ihtär kabledecek  baaşışları, açıkladı “Yardım eli” kurumun başı.

Bölӓ baaşlamak akţiyası geçiriler her yıl. Bu yıl toplanılmış 6 946 ley, 100 evro, 50 dollar paraların yardımınnan “Tvori Dobro” konţertından taa çok ihtiar kabledecek baaşışları.