Kıpçak küüyündä voleybol turnirı yapıldı sport veteranın İvan Kopuşçunun adına. Sportçu ilk, kim başladı voleybol  turnirlarını Gagauziyada geçirmää. Bu sport yarışmalarında takımnar Avdarma, Kayrakliya hem Kopçak  küülerindän pay aldılar.

Voleybol Kıpçak küüyündä en ilerleyan sport soylarından biriydi. Voleybol küüdä başladılar oynamaa  1950-ci  yıllardan. Sport veteranı İvan Kopuşçu  ozamannar voleybol takımında oynardı. Onun laflarına görä sport yardım eder  herbir  iştä.

«Ne lääzım voleybol oynamaa deyni: top, setka hem iki direk. 1951-ci -52-ci  yıllarda okula taa gezärdim hem  voleybolu  sevärdim. Kıpçak  hem  Kayrakliyä takımnarın ilk buluşması 1955-ci  yılda oldu. Biz ozaman ensedik», — annatı voleybol veteranı.

Kıpçakta var  düşünmeklär, nicä  sport  infrastrukturasını ilerletmää. Küüyün primarın yardımcısı  Anatoliy  Talmaç  nışannadı, ani  voleybol  gençleri başladı taa çok meraklandırmaa.

«Gagauziyanın,Tarakliyanın takımnarına şükür  deerim, ani büün  geldiniz bizä. Biz sevineriz.Ötää  dooru  kaaviledecez  ilişkilerimizi hem  barabar çalışacez, ki  sport  ilerlesin», — söledi Anatoliy  Talmaç.

Turnirda ilk eri kazandı Kıpçak  küüyün takımı, ikincisini —  sportçular Avdarmadan, üçüncü  oldular  Kayrakliyanın voleybolcuları hem  dördüncü  erdä Çadır  kasabası.

«İi oynadık,ikinci eri  aldık. Sevineriz. Yarışmaklarda çoktan  pay alȇrız, yakın 20 yıl, taa okuldan», — annattı Avdarma küüyün takımın başı Nikolay Yazadjı.

 

«Saa olsunnar hepsi gelän takımnar. Oyunnar üüsek uurda geçtilär. Hepsi sportçular bitkiyädän dayandılar», — söledi Kıpçak küüyün  takımın kapitanı Yüriy Baboglo.

Hepsi takımnar diplomnarı, ödülleri hem para premiyalarını kablettilär, tarayıcılara takımnarın biri – birinä geçän kuboo verdilär.