Moldovanın Parlamenti iki okumaklan kabletti kanonu, angısına görä Moldova hem Rumuniya baalanaceklar biri-birilerinnän Ungenı köprüsününnän.

Eni köprü baalayacek Moldovanın M1 trasasını, angısı koyulacek Ungenı kasabasında hem baalanacek Rumuniya devletinın yolunnan, angısı geçer Tırgu Mureş hem Yassı kasabalarından.

Annaşmaya görä Rumuniya alȇr üstüna köprünün hem yolun düzülmesini kendi teritoriyasında, Moldovanın tarafından yapılan işlär dä respublikamızın bücetindän ödeneceklär. İlk sayılara görä bu uura lääzım olacek 36 mln.ley, nışannadı MD infrastruktura hem regional ilerlemesi ministrusu Andrey Spınu.

ANDREY SPINU,  infrastruktura hem regional ilerlemesi ministrusu: “Moldovanın yol sistemasının katılması Trans Evropa yolları sistemasına, bulunȇr Hükümedin ön plannarında. Rumuniya bu proekt için verer 40 mln.evro, Moldovanın tarafından 36 mln.ley”.

MD Parlament deputatı Adrian Keptonar nışannadı, ani bu proektin gerçeklenmesini yıllar boyunca  bekleerlär Ungenı kasabasının yaşayannarı.

ADRİAN KEPTONAR, Moldova Parlamentın deputatı: “Ungenı-Yassı kasabalarını baalayan köprünün düzülmesini kasabanın yaşayannarı bekleerlär pek çoktan. Bu verecek kolaylık yaşayannara taa kolay komuşu devletä etişmää hem ha üüsek uura kaldırmaa baalantıları kultura hem üüretim uurlarında”.

Önemli urgulamaa, ani bu köprünün düzülmesi verecek kolaylık Moldovaya taa hızlı baalanmaa Evropaylan hem Baamsız devletlär birliinnän dä.