Komrat regional bibliotekasında geçti tombarlak masa temaya: « Gagauz avtonomiyası – başlaması». Toplantı baalıydı Gagauziyanın 25-ci yıl donümünä.

«Gagauz avtonomiyası – başlaması» — bu tema, angısı baalı gagauz halkın istoriyasınnan. Tombarlak masanın pay alannarı annatılar gagauz inteligenţiyanın büük yaptıkları için bitki 30 yılın süresindä.

Tombarlak masanın pay alannarında vardı büük kolaylık siiretmää ilk gagauz dokumental kinosunu «А земля прибывает во веке». Bu filmı çıkardı 1993 – cü yılda Mihail Sidorov. Tekstı okudu gagauz peetçi Pötr Moyse.

Gagauz avtonomiyanın veterannarı aklılarına getirdilär o uzak yılların olaylarını. İlk gagauz dokumental kinosu – bu pek ii proekt, nışannadı Gagauziyanın patriotu, Çadır kasabasının M. Çakirın adına kultura- aaraştırmak merkezin  başı, protoierey Dmitriy Kioroglo.

Gagauziyanın taa bir patriotu Födor Marinoglo nışannadı, ani ilk gagauz dokumental filmı sayılȇr gagauz halkın istoriyasının canı. Lääzım terbi etmää avtonomiyanın gençlerindä patriot duygularını, çizgiledi Födor Marinoglo.

Çok laf sölendi televizionun rolü için cümnedä. Televizion hem da kino biri birizsiz yok nicä çalışsınnar, nışannadı Gagauz avtonomiyanın payalanı İvan Burgudjı, angısı, nicä annaşıldı, yardımcı oldu kurmaa kinolentayı.

Tombarlak masanın payalannarı sayȇrlar, ani annatmaklar Gagauziyanın istoriyası için yardım edecek korumaa dilimizi, adetlerimizi, kulturamızı, o zenginnikleri, angıları kaldılar bizä dedelerimizdän.

Dekabrinin 23-dä tamannanacek 25 yıl, nicä Moldova parlamenti kabletti kararı Gagauz Erin avtonom-territorial statusu için.

Tekst: P.Barbova, video: А. Тоpal, montaj: М. Каzaku