Üüredici, yazıcı, Ana dilini sevän hem ilerledän insan-Mariya Köse, kendi 75-nci yıldönümünü nışannadı. Kendi yaşamasını o halkına adadı.
Mariya Georgievna Köse-Valkaneş kasabasının yaşayanı. Kendi zanaat yolunu 1974-cü yılda Çeşmäküüyü şkolasında başlamış. İlk uroonu büün dä aklısında tutȇr.
«Başladım işlemää Çeçmäküüyündä. Beni instituttan soa yolladılar Manta küüyünä işlemää, bän orayı gitmää istemäzdim, çünkü moldovanca bilmäärdim. Da bobam beni götürdü kendi dostuna Çeşmäküüyünä. Bän o uroo- bir afta yazdım salt plan. Bän onu yazaardım, sora okuyardım-beenmäzdim, koparardım te o yazıcılar gibi. Sţenariya yazardım, sora urokta hiç kullanmadım onu, çünkü pek çok kafamdan geçirdiydim»,- nışannadı Mariya Köse.
Mariya Georgievna üüredicilää 44 yıl verdi. Bu yılların süresindä en ilkin rus dilini , sora da gagauz dili uroklarını götürdü. Büün Mariya Georgievna pensiyada bulunȇr, ama kendi üüredicilik zanaatına daarsıklık onun üreendä büün dä var.
«Özleerim gençliimi, özleerim te o şkolayı, neredä bän başladım işlemää. Sora başka şkolalar da oldular, ama bana o şkolalarda da çok uygundu işlemää. Olmadı lafım ne direktorlarlan, ne üüredicilärlän, ne üürenicilärlän. Ama o ilk şkola aklımda»,- açıkladı Mariya Georgievna.
Mariya Georgievna Köse bulundu o üüredicilerin arasında, angıları 80-ci yıllarda gagauz dilini predmet olarak okullarda üüretmää başladı.
«Olur demää, ani direktor bizä braktı kendi kararımıza, ne yapabilecez. Çünkü o bilärdi, ani biz parmaktan urok alȇrız. Zordu, ama uşaklar hepsi lafedärdilär ozaman. Bana kolaydı onnarlan lafetmää»,- Mariya Georgievna Köse nışannadı.
Mariya Georgievna Köse aktiv pay aldı 90-cı yıllarda gagauz halkının milli ruhu
dirilmesi için güreşindä. O pay alardı hepsi mitinglerdä, toplantılarda.
«Ozaman herbirin ürää yanardı avtonomiya için. Ne duygulardı ozaman canda», -nışannadı Mariya.
Büün Mariya Georgievna zanaatlanȇr yaıcılıklan. Onun en anılmış yaratmaların birisi «Bozbey tamızlıı» romanı.
Avtor: A. Terzi, operator: S. Georgiev, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!