Kongazçik küüyündä — açık ders geçti. Bu derstä üüredicilär hem üürenicilär üüsek musaafiri kablettilär — Marinoglu Toduru. Gagauz peetçisi, yazıcısı, Şannı üüredici — Todur Marinoglu bu yıl 70 yaşını tamannadı. Bu ders onun yaradıcılık yoluna adalıydı.
Olaya 2-9 klasların üürenicileri katıldılar. Onnar peet okudular, sţenkaları gösterdilär, türkü çaldılar. Butakım uşaklar avtora kendi saygılarını gösterdilär.
«Bu yıl F.Marinoglu tamannadı 70 yaşını, da biz onu kutlȇȇrız bu dataylan. Paalı Födor İvanoviç, sevineriz, ani geldiniz bizim okulumuza».
Marinoglu Todurun toplumnarı: «Ürek dalgası», «İlkyaz girdi aramıza», «Açık güllär», «Dış okumakları». 1999-da uşaklar için «Tatlı düşlär» kiyadı tiparlandı.
Açık dersi Stepanida Patraşko geçirdi: «Biz hepsi gagauz yazıcıların yaratmalarına pek gözäl danışȇrız. Biz isteeriz onnarı bilmää. Annadȇrız onnarın şiirlerini. Okuyȇrız onnarın annatmalarını. Ama büünkü dersimiz T.Marinogluya adalı, neçinki o bu yıl tamannadı 70 yaşını».
2000-ci yıldan beeri T.Marinoglu Gagauz Yazarlar Birliin başın yardımcısı. Meraklı avtorun analar için sözleri. Te nasıl düşüner Todur Marinoglu analar için: «Gezin, görün istäärseniz bütün dünneyi, kalmasın hiç bir köşesi dä, giinin ölä gözäl, nesoy taa hiç kimsey yoktur giindi, dadın en tatlı imeklerdän… ama mamunun laflarından taa gözäl, taa tatlı, ta mehlenni bişey yok bu dünnedä. Onun kraalı saçlarında, derin buruşuklarında, ürek sancılarında bizim en paalı zamanımız – küçüklüümüz kaldı. Yoktur can doysun erdä yaşamaya, yoktur insan doysun demää – mamu».
«Biz lääzım sizinnän lafedelim ana dilimizdä taa küçüklüümüzdän. Ozaman bizim dilimiz bizä ta paalı olȇr. Biz çekederiz annamaa, duymaa onu taa derindän. Nesoy da dilleri bilmesän, açan ana dilindä lafedersin ozaman taa raat, ozaman taa sıcacık, ozaman duyguların da taa açıklanȇrlar»,- dedi yazıcı.
«Okulda gagauz dili ilerleer», — söledi gimnaziyanın başı Elena Statova.
Moldovanın hem Gagauziyanın en mekalı haberleri GRTnın Telegram kanalında!