Svetloe küüyün agrar kolecı verer uşaklara kolaylık kabletmää meraklı zanaatları . üüretmäk kurumu hazır 150 abiturient kabletmää.
İlk etapa görä dokumentleri birkaç gün taa kabledeceklär. Şindiki vakıt 90 kişiyä yakın şansora ayırdılar kendisinä zanaat da geldilär agrar-tehnik kolecına. Gençlerdä var kolaylık beş zanaattan birisini ayırmaa, angısı onnarın cannarına taa yakın. Üürenmää var nasıl bücet erlerindä yada kontrakta görä, haberledi kolecın başı Andrey Lambru.
«İlk zanaat o «Buhgalter». Burada veriler 30 er. İkinci zanaat o «Çiftçiliktä elektrofikaţiya», burayı biz var nasıl alalım 31 kişi, angılarından 22-si o bücet eri, 9 da er kontrakta görä. Ne baalı buhgalter zanaatınnan orada 13 bücet hem 17 kontrakt eri var. Bu yıl var diişilmeklär agronomiyada. Büün onun adı «Çiftçilik tehologiyaları hem ţifrovizaţiyä». Başka bir zanaat o «Çiftçiliin mehanizaţiyası», buradad 30 er var, angılarından 22 bücet eri, 8-da kontrakt . Sıradakı zanaat o «Avtomobil transportun kullanması». Buradada 30 er var, angılarından 22 bücet eri,8-da kontrakt eri»,- söleer kolecın başı.
Yıl- yıldan informaţion tehnologiyaları bizim yaşamamıza girerlär, bunun için kolec kendi material bazasını savaşer taa ii yapmaa, kurup studentlär için uygun koşulları üürenmäk için. Nicä nışanandı kabletmäk komisiyasının sekretari, Viktor Tatar, taa sık uşaklar ayırȇrlar çiftçiliklän baalı zanaatları.
«Ne baalı zanaatlarlan, en sorumnu abiturientlerin araalrında şindiki vakıt o çiftçiliin elektrofikaţiyası hem tehnik transportun kullanması»,- dedi Viktor Tatar.
Kolecdä kaliteli üürenmek için hepsi zanaatlar için kurulu koşullar. Grant programaların yardımınnan türlü laboratoriyaları donnattılar lääzımnı tertiplärlän, var kolecdä dronnar da , angıların yardımınnan studentleri üürederlär.
«Sentäbrinin birindän bizdä agronomiyada eni zanaat olacek o «Agronomiya disţiplinalarda informaţion tehnologiyalar». Bu bir enilik ,neçin ki agronomiyada uzmannar lääzım bilsinnär ţifra tehnologiyalarını kullanmaa»,- söleer Agronomiya kafedrasının başı Svetlana Çerkas.
«Bitki vakıtlar kolecın material tehnik bazası enilener. Şindi «Livada Moldovey» proektin yardımınnan yapılȇr bir merkez, angısı zamandaş tehnikasınnan donadılı olacȇk »,- nışannadı tehnik disţiplinalarda üüredici Konstantin Sirmesku.
Nicä nışannadı kolecın başı ,onnar için kim ayırȇr «Avtotransport diagnostika» zanaatını var avtopark, neredä gençlär diil sade teoriya bilgilerini kablederlär, ama praktikada da onnarı kullanȇrlar.
«Oktäbir ayında bizdä açılacȇk eni bir merkez zamandaş tehnologiya proţeslerinnän. Da student, angısı lääzım olacȇk traktora pinsin hem çiftçilik tehnikasını kullansın geçecek üürenmeyi bu merkezdä maasuz trenajorlarda. Burada hepsini üürenecek görecek. Biz yapacȇz hepsini, ki genç uzmannar iş panayırında sorumnu olsunnar»,- sayȇr kolecın başı Andrey Lambru.
Sergey 9-cu klasın başaranı . Geldi Çadırdan. O ayırdı agrar kolecını da isteer kendi yaşamasını elektrikaylan baalamaa.
«Bana deyni bu zanaat pek islää. Gelecek vakıdında o para verecek»,- emin Sergey.
Kolecın klaslarında, laboratoriyalarında , iki obşejitiyada, remont yapılȇr. Studentlär için hepsi uygun koşullar yapıldılar, yıkanmak hem imäk odalarda, içerlerdä, neredä var nasıl iki 3 kişi yaşasın. Bıldır kolec 154 student üürenmeyä kabletti. Bununnan o kendi planını yapabildi.
