Yolca gidärkana ufak yannışlıkları yapan şoferlär en ilkin laflan cezalanacȇklar. Er o 1 yılın içindä hep bu yannışlıı yaparsa— protokol yazılacȇk. Busoy kanon iniţiativası Moldova Parlamentindä bakılȇr.
Ufak kanon bozmaklarını yapan şoferlär en ilkin laflan sölenilän cezaları kabledeceklär. Ama ileri dooru mutlak dikkat olsunnar lääzım, da en az 1 yılın süresindä hep bu kanon bozmasını tekrar yapmasınnar. Er yaparsaydılar, onnara protokol yazılacȇk. Aazdan yapılı ceza var nicä olsun, er şofer şafkları koşmadıysa yada bişey bu hem başka sistemalarda bozuksa, düzmediysä. Biz sorduk avtonomiyanın yaşayannarından, ne onnar bu kanon iniţiativası için düşünerlär.
«Bu kural ölä dä vardı. Onnar en ilkin laflan sölesinnär lääzım, da sadecä bundan sora ceza koysunnar. Ama busoy yapmȇȇrlar. Jezalȇrlar. Mutlak protokol yazȇrlar. Örnek, bekim şafkları koşmaa unuttum. Hepsi maşinalarda şafklar kendi başına koşulmȇȇrlar. Bunun için haber versinnär lääzım. Bu eniliklär lääzımnı , sayȇrım. Hepsi şoferlär isteyip tä kuralları bozmȇȇrlar».
«Pek işlää enilik. Esaplı şoferlara deyni».
«Er en ilkin laflan sölärsälär, hemen protokol yazmarsalar islää olacȇk. Çünkü hertürlü olȇr. Yolca gidersin, bekim bir yol nışanını esap almadın. En ilkin söz cezası olsun lääzm. Ama hepsi şoferlar kuralları bilsinnär lääzım. Kimi kuralları bozmak hatalı diil, deyelim, şafkları koşmadın, yada bir nışanı vakıdında görmedin. Ama var durumnar, açan herbiri mutlak kurallara görä maşinayı kullansın lääzım».
«Hepsi şoferlar kuralları bozmȇȇrlar. Ama var onnar, kim birdän iki maşinayı geçmää savaşȇr. Ama er lampoçka yandıysa, neşin ceza koymaa? Onnar sa ardına takışȇrlar, protokol yazmaa deyni».
Gagauz Erin şoferları maşinalarını büük hızlılıkta kullanȇrlar hem dä şafk etmäk sistemalarında olan bozuklukları vakıdında düzmeerlär — butakım yollarda durum için Komrat-Çadır patrul izmeti ofiţeri İvan Jeçkov annadȇr: «Şoferlar hızlılık kurallarını esaba almȇȇrlar, ne yaşamak punktların sınırlarında ne dä onnarın dışında. Hep ölä sık karşı geleriz olaylarlan, açan maşinada gabaritlär hem faralar işlämeerlär».
Komratta şoferlar sık maşinalarını parkovka için diil uygun erlerdä brakȇrlar, İvan Jeçkov söleеr: «Şoferlar maşinalarını neredä olursa brakȇrlar. Kimär kerä yolların çatıraklarında da brakȇrlar. Butakım onnar hatalı durumnarı kurȇrlar».
Diişilmeklär Kanon bozmakları kodeksinä giriştirileceklär ondan sora, nicä bu soruş ikincilää Parlamentin oturuşunda bakılacȇk hem kabledilecek. Bundan kaarä o Ofiţial Monitorunda bakılacȇk.
