KDU genişleder kolaylıklarını, eni baalantıları hem annaşmakları kurarak iş birlii için Türkiye devletin universitetlerinnän. Türkiye Devletin Aksaray Universitetin delegaţiyası bu günnerdä buluştu KDU rektorunnan. İmzalandı annaşmak barabar çalışmak için iki universitetin arasında.
Buluşmanın vakıdında KDU başı Sergey Zahariya urguladı, ani Gagauziya hem Türkiye aralarında sık baalantılar var, annattı universitetin istoriyası için hem belli etti üüretim kurumun başarlarını.Bundan kaarä rektor urguladı,ani Aksaray universitetinnän barabar çalışmak açacek eni kolaylıkları studentlär , uzmannar hem üüredicilär için.
«Türkiye Devletinnän bizim herzaman ii ilişkilerimiz var.Bu yıllarda 50 taane sözleşmäk, annaşmak Türkiye universitetlerinnän yaptık.Bu büük iş,çünkü biz bileriz,ani KDU dünnedä bilerlär,ama Türkiyedä bizi taa ii başladılar tanımaa»,- dedi rektor Sergey Zahariya.
Buluşmanın vakıdında iki taraflı iş birlii annaşması imzalandı KDU hem Aksaray universitetin aralarında. Bu annaşmak verecek kolaylık barabar yapmaa türlü aaraştırmakları, paylaşmaa becermeklärlän, kurmaa konferenţiyaları,seminarları hem kultura olaylarını. Aksaray universitetin başı Alpay Arıbaş nışannadı iş birliin önemlisini.
«Türkiyenin gerek Gagauz bölgesine Moldovaylan genel manaada ilişkileri çok köklü .İnşallah bundan sonra olacak daha, da büyüyecek bu işbirlii daha fazla artırmak istiyoruz»,- Aksaray universitetin başı Alpay Arıbaş nışannadı.
Aksaray universiteti anılmış Türkiyedä kendi kaliteli üüretiminnän türlü uurlardan, bildirili kendi inovaţion üüretim kolaylıklarınnan studentlär için.
Moldovanın hem Gagauziyanın en mekalı haberleriGRTnın Telegram kanalında!