Kazayak küüyündä beklenilän düzmäk işleri başladılar Çapaeva sokaanda. Proektta bakılı düzmää bin metradan zeedä yolu, ne verecek kolaylık insannara hem transportta taa ilin geçmää buradan.
Şindiki vakıtta başladıldılar işlär Lenina sokaandan Puşkina sokaanadan. Bu işlerä para verildi Yol Fondundan haberledi primar Grigoriy Kior: «Bu proektä görä lääzım düzülsün 1130 metra yol, bayıra dooru, küüdän çıkınca lagerä dooru, Stepnaya sokaanadan. Yolun genişlii olacek 5.5 metra, hep ölä da biz trotuarı da insannar için düzecez — o da bir metra olacek geniş».
90-cı yıllarda bu yola plitalar koyulmuştular (önce sa burada asfaltmıştı). Yıllar geçtikçä plitalar kırılmışlar. Burada zor geçmää, transport kırılêr. Bu üzerä kabledildi karar erleştirmää brusçatka, ki taa kaavi olsun bu yol. Şindi kurum, angısı tenderı taradı, çeketti plitaları çıkarmaa. Ilk etapa görä lääzım düzülsün 225 metra yol. Ama bütündän Çapaeva sokaanı düzmää deyni lääzım 15 milliondan zeedä ley. Ilkin proektä görä bakılıydılar suları doorutmak için tertiplär, ama bu uurda şindi paralar etişmeerlär — o üzerä bakılı koymaa Lenina sokaana baalı tertipleri, ki suları toplasınnar. Nicä söledi primar Grigoriy Kior hep ölä verildilär dokumentlär «Europa aproape» programasına, ki olsun kolaylık bütün bu yolu düzmää — burada bakılı üç etap.
«Bizim kontribuţiyamızlan orada taa 8 million leydän zeedä. Bekleyecez konkursun çıkışlarını da ölä karar kabledecez, ki yolu bitkiyadan yapmaa»,- ekledi primar.
Kazayak küüyün yaşayannarın birisi kendi düşünmeklerini açıkladı.
«Elbetki lääzımnıydı düzmää bu yolu, neçinki yoktu nicä geçmää bu yoldan ne yayan, ne da maşinaylan. Transport kırılêêr. Haliz açan havalar prost, yok nasıl. Pek lääzımnı, biz sadece sevinecez buna».
O plitalar, ani çıkarêrlar Çapaeva sokaandan, nasaatın kararına görä doorudaceklar başka sokakların düzmesinä.
Moldovanın hem Gagauziyanın en mekalı haberleri GRTnın Telegram kanalında!