Kazayak küüyü nışannadı Hederlez hem Klisä yortularını. Bu gün topladı yaşayannarı, musaafirleri hem kuvetlerin azalarını dua ermektä hem yortuda.
Yortulu liturgiya geçti Kazayak küüyün Ayoz Georgiyin adına klisesindä. İnsannar dua ettilär saalık için, usululuk için. Gagauziya Halk topluşun deputatı Aleksandr Dülger kutlamak laflarını söledi.
«Dua ederim canımdan bütün urektän herbir Kazayaan yaşayanına, saalık,varlık , uygunnuk, bizim küü gitsin ileri da açsın bir çiçek gibi, çok yıl hepsinä dua ederim»,- Aleksandr Dülger nışannadı.
Yortulu liturgiyada bulundu Moldova Parlament deputatı İvanna Köksal: «İsteerim, ki bölä yaamurlarımız yaasın, insannarımız duadan atılmasın, inanı içindä taşısın, bir tarafa saklamasın, çünkü sade inannan, sade becermelerimizlän var nicä ilerleyelim».
Bu gün insannar için hazırlandı türlü olaylar. Parkta geçti yarmarka, neredä pay aldılar küüyün hepsi üüretim kurumnarı, ustalar. Toplanılan paralar koyulaceklar stadionun düzülmesinä. İnsannar paylaştılar duygularınnan bu yortuda.
«Bütün Gagauziya dua etmää saalık, bereket, çok yaamur yaasın, bereketimiz da olsun büük. İsteerim, ani uşaklar sevinsinnär, işidelim onnarın tatlı seslerini küüyümüz da yaşasın taa binnän yıl ileri dooru».
Kazayaan Kultura Evindä geçti yortulu konţert programası. Onun sınırlarında adetçä kutladılar Kazayak küüyün yaşayannarını. Primar Grigoriy Kior söledi kutlamak laflarını hepsi yaşayannara.
«Bölä bir büük yortu hen önemni, angısını biz sayȇrız, neçinki hep inan klisedä, dualar bizi lääzım getirsin o uura, ani insanda yaşamak taa ii olsun, bereket, usluluk, annaşmak»,- Grigoriy Kior söledi.
Kutladılar yortuylan Kazayak küüyün yaşayannarını Gagauziya Bakannık komiteti azları.
«Hepsinä saalık, usluluk ben sevgi aylelerdä dua ederim»,- Gagauziya başkanın işlerindä bakanı, İvan Kolioglo, nışannadı.
«Isteeriz hepsinä dua etmää usluluk aylelerdä, uygunnuk hem herbirindä işlär sadece ileri gitsinnär»,- dış işlerdä bakanın yardımcısı Üriy Kuzneçov, diledi.
Moldovanın hem Gagauziyanın en mekalı haberleri GRTnın Telegram kanalında!