Kalp hastalıklar kalȇrlar ölmenin baş sebeplerinnän bütün dunnedä. Kalp-damar hastalıkların aralarında zanaatçılar belli ederlär kalbin işemiya derdini, infarkt, aritmiya hem gipertoniya. Sebeplär hem profilaktika için anandȇr Natalya Andrieş.
Kalp hastalıkların sebepleri türlü var nasıl olsunnar: anadan-bobadan geçmiş, yaşamak koşullardan çekiler, prost imeklerin kullanması, aaz gezmerklär hem streslar haberledi, Komrat dolay bolniţasının kardiologiya bölümün başı Andrey Topalov. Bu baş faktorlar, angıları var nasıl kalp-damar hastalıklara getirsin. Bunun için lääzım kontrol etmää tansionu.
«İlkin tansionu paţient bakȇr uyandıktan sora. Var nicä imemää hem içmemää. İlkin ne lääzım yapmaa — varsaydı nicä taa erken onu ölçmää, ki annamaa nesoy ţifralar hem ne bununnan doktor lääzım yapsın. Bu ţifraları kiyada yazmaa lääzım. Bölä bir protokol yapmaa. Doktora taa yakışıklı olacȇk bakmaa, da dooru ilaçlamayı vermää»,- annattı Andrey Topalov.
Kalp ritmın bozulmasının taa sık sebepi -o titirek aritmiyası.
«Bu açan kalp diil birtürlü sıkılȇr hem taa sık, nekadar lääzım. Titirek aritmiyanın riskı o trombların peydalanması. Titirek aritmiyası hastalık, angısı taa sık insultlara getirer»,- nışannadı kardiolog.
Büün Moldovada kalp- damar hastalıklar ölmäk olayların yarısını kurȇr- 55%. Onnar baalı riskların fiziologiya faktorlarına- üüsek tansion, üüsek holestirin, şeker uuru, tavlanmak. Bölä nışannarlan doktora danışmaa maasuz lääzım, ki durum kritik uuruna etişmesin. Lääzım saalıklı yaşamayı götürmää, streslara düşmemää hem sportlan zanaatlanmaa.
Kardiologların Evropa cümnenin nasaatlarına görä, türlü yaşlarda eer yoksaydı gezmäk uurunda hastalıklar 150-300 minut aftada var nasıl aktiv sportlan zanaatlanmaa. Burayı girer kaçmak, hızlı gezmäk, üzmäk, lisapettä gezmäk. Bu en yakışıklı ölçülär, angılarını var nasıl yapmaa. Gipodinamiyaylan güreşmää.
Nekadar taa ileri çekedecez kendi saalık için düşünmää okadar taa çok şans kalplan problemalar olmasınnar!
