Zor hem çok iş, büük cuvapçılık iş erindä: bu koşullarda işleyän insannar hızlı yorulȇrlar, onnarın psihologiya hem ȇmoţional durumnarı aar olȇr. Stress beterinä onnarın saalıklarına zarar olȇr. Saalık ministerliin açıklamaklarına görä devlettä vatandaşların 12% zeedesi depressiyada hem raatsız bir halda bulunȇrlar, çünkü iş erlrindä türlü zorlukları var. Bu problemalar taa büük olȇrlar ozaman, açan psihologiya uurunda zorlukların çözülmesi için ne işçi, ne dä önderici bişey yapmȇȇrlar, söleer psiholog Tatayana İvanova.
«En ilkin işçi maasuz kendi işini yapsın lääzım. Nicä bu dokumentlerdä yazılı. Taa zeedä diil lääzım işlemää. O vakıdında işä gelsin lääzım, vakıdında da gitsin. Zeedä, er o istämärsä, kimseyciin yok hakı onu işlettirmää. İnsan, angısı dinnenmeer, kendisinä prost yapȇr. Er o istärsä, hem ona bunun için ödärsäydilär taa zeedä, o var nasıl oyalansın iştä da taa çok vakıt işlesin. Ama zorlan iş yaptırtmaa kimseyin hakı yok. Herbir insan dinnensin lääzım. O iştän käärä da bişey görsün lääzım»,- dedi Tatyana.
Aaraştırmaklar göstererlär ani stresta bulunan işçinin iş erindä faydası iisiler. O dikkatsız olȇr. Başlȇȇr unutmaa, işini kaliteli yapmȇȇr. Bu üzerä herbir önderci kendi işçilerinin ruh hem moral saalıklarını korusun lääzım. Er istärsä iş islää hem hızlı gitsin, uygun koşulları kursun lääzım. Psiholog Tatayana İvanova söleer, ani bu uurda faydalı olȇrlar türlü yortulu olaylar. Dinnenmää kolaylık verän eni iş grafiin kurması hep ölä islää sonuçlara getirsin var nasıl — söleer uzman.
«Önderici olmaa becermää lääzım. Cuvaplı olmaa lääzım. Bu işi seftä yapannar, elbetki, yanılȇrlar, nesä dooru yapmȇȇrlar. Ama menedjment — o bir bilim. Üüürenmää lääzım. Kendi işini dooru götürmää üüürenmää»,- nışannadı psiholog.
Moldovanın kanonnarında yazılı, anı öndericilär işçilerinä deyni uygun koşulları kursunnar lääzım. Yazılı burada işçilein ruh hem moral saalıkları için dä, çizgiledi Gagauziyanın iş inspekţiyası bölümün başı İvan Komur.
«Neyä uzun vakıt sürtän stress getirsin var nasıl? İnsanın saalıına zarar olȇr. Zara olȇr, açan iş erindä o türlü diskriminaţiyalarlan karşı geler, açan onun haklarını bozȇrlar, açan korkudȇrlar, ani o işini kaybetsin var nasıl, açan ay parasını vermeerlär, açan lääzımnı koşulları kurmȇȇrlar. Bu durumda insanın psihoȇmoţional durumuna büük zarar olȇr»,- çizgiledi Komur.
Kurum başarılı olsun hem ilerlesin deyni öndericilär işçilerin psihoȇmoţional hallalrını göz altında tutsunnar lääzım — nasaat ederlär ekspertlär. Butakım onnar hem kanonda yazılı kuralları kullanacȇklar, hem dä insannık kalitelerini koruyacȇklar.
Avtor: V. Çoban, montaj: A.Topal