2024 yılının ilk altı ayında Moldovanın yaşayannarı aldılar banklardan taa sık kredit yaraştırarsak geçän yıllan. Bunu belli etti analiz, angısını açıkladı «Viitorul» Geliştirmäk hem Soţial İniţiativaların İstitutun ekonomika eksperti Väçeslav İoniţa. Ona görä, bu baalı harç hem ipoteka kreditların proţent stavkanın küçültmesinnän.
İki yıllık durgunmaktan sora ekonomika sferasında, angısı oldu koronavirus pandemiyanın hem Ukrainada cengin beterinä, Moldovada insannar taa sık kredit başladılar almaa, nışannȇȇr ekonomika eksperti Väçeslav İoniţa. Bunun önemni sebepi taa faydalı hem taa uygun kredit koşulları hem küçük proţent stavkası. Yaşayannar alȇrlar kreditleri leylän.
«Bugün kreditlerin sayısı, angılarını banklar verdilär insannara hem üridik kurumnarına, kurdu yakın 70 mlrd ley, büüyüp sadece bu yılda 5,7 milliarda. Esap alarsaydınız, ilk yılın yarısında bu sayı büüdü iki kat, yaraştırarsaydık geçän yıllan»,- dediekonomika eksperti Väçeslav İoniţa.
Kredit almasının büümesini açıkladı Komratta bulunan finans kurumun bölümün öndericisi dä.
«Yaraştırarsaydık geçän yıllan kredit almasının payı bu yılda büüdü, çünkü insannara deyni kreditlär taa uygun oldular, onnarın payı düştü. Moldovanın Milli bangı bitki yılın içindä hep küçüldärdi onu.Büünkü günä, en efektiv stavka, angısına görä insannar alȇrlar kredit zalogsuz, kurdu 10% yılda. Geçän yılda, hep o kredit koşullarda stavka kurardı 15% yılda»,- Komratta finans kurumun bölümünün öndericisi Vitaliy Ţvätkov nışannadı.
Hep ölä, stavkaların küçülmesi belli ediler diil sadece harç, ama ipoteka kreditlerindä dä.
«İnsannar başladılar meraklanmaa ipoteka kreditlerinnän dä, çünkü bunnar uzun vakıda veriler. Ev satın almak hem düzmäk için yakışȇr almaa kredit 25 yıla. Onnarda da stavkalar artık küçülerlär. Büünkü günä, onnar bulunȇrlar 7-8% aralarında»,- çizgilediVitaliy Ţvätkov.
Ekspert Väçeslav İoniţa nışannȇȇr, ani proţent stavkaları ileriyä dooru taa iisileceklär. Bu sebep için kreditin alması olacȇk insannara deyni taa da uygun.
«Eer 5 yıl geeri kreditin ödemesinı var niceydı yaraştirmaa aylenin 6 aylık bücet sayısınnan, bugün o kurȇr sadece 3 aylık bücet sayısıni. Bu nışannȇr, ani eer biz alarsak büün krediti, olacek taa kolay onu ödemää»,- Väçeslav İoniţa nışannȇȇr.
Väçeslav İoniţa sayȇr, ani kreditlerin proţent stavkası taa iisilecek hem yılın bitkisindä o kuracek 7%-dä kadar.
