Ministruların kabineti kararladı finans yardımını aylelerä, angıları terbiederlär uşakları 5 yaşına kadar, kolaylıksız uşaklara hem da büük yaşta kolaylıksız insannara. Bütündän yardımı kabledeceklär 230 bindän zedä insan.
Hepsi aylelär uşaklarlan 5 yaşına kadar, angıları duudular 2020 — ci yılın aprelin 1 — dän 2025 — ci yılın aprelin 30 — dan, kabledeceklär finans yardımını sayıda 1500 ley herbir uşak için. Bu yardım veriler Paskellä yortularına. Bu neetlär için bakılı bütündän 470 million ley, haberledi MD Parlamentin öndercisi İgor Grosu: «Paskellä yardımı verilecek hepsi uşaklara 5 yaşınadan, onnar için verilecek 1500 ley, bu sayıya girer diaspora da. Biz hep ölä yardım ederiz o aylelerä dä, angıları bakȇrlar kolaylıksız uşakları hem büük yaşta kolaylıksız insannarı. Bölä olaylar da aylelär kabledeceklär yardımı sayıda 5000 ley».
Nicä çizgiledi Moldova devletin iş hem soţial koruması ministrusu Aleksey Buzu , aylelerä, kabletmäk için bir sıra finans yardımını, diil lääzım vermä danışmaları yada toplamaa dokumentleri, yardımı kabledeceklär yakın 230 bin aylä.
«Finans yardımı verilecek hükümetlän proaktiv sıraya görä. Kimseya, hiç kimseya ayledän, ne ana — bobaya, ne kişileri, angıları bakȇrlar bu uşakları, diil lääzım olacek gelsinnär, versinnär deyni danışmaları, toplasınnar deyni dokumentleri. Hükümet, barabar Millet sigorta soţial kasasınnan yaptılar kendi ev işini, biz belli ettik bu ayleleri»,- Aleksey Buzu haberledi.
Avtonomiyanın yaşayannarı kendi bakışlarını açıkladılar kompensaţiya için.
«Bän sayȇrım, ani 1500 ley yardım edeceklär aylelerä, ne için zamandaşta bu aylelär kabletmeerlär, var nasıl sölemää kazanç paralarını, da bu yardım önemni aylelerä».
«Biraz yardım edecek, ama bu az».
«Bekim, kimi aylelerä yardım edecek. Fukarä insannara, bän sayȇrım, ani yardım edecek, başka aylelerä da yardım edecek, neçinki zamandaşta krizis, da insannara etişmeer. Sayȇrım, ani bu islä kompensaţiya».
«Aylelär, neredä çok uşak, bu islä yardım onnar için, neçinki bizdä çok fukarä uşak var».
«Elbetki, ama nicä siz isteerisniz, uşak için, bu pek önemni hem faydalı».
Ödemekleri var nasıl olacek kabletmää kirez ayın 2 — dän, paralar yollandırılacek soţial kartalara, yada identifikaţiya aktiv banka kartalarına. O insannar da, angılarında yok karta, kavledäbileceklär bir sıra finans yardımını devlettän poçta bölümnerindä.
Moldovanın hem Gagauziyanın en mekalı haberleri GRTnın Telegram kanalında!