MD onlayn kolaylıkların kullanmasının zeedelenmesininnän, yaşayannarın personal bilgilerin korunması soruşu taa aktual olȇr. Yaşayannar türlü saytlarda onlayn platformalarını kullanȇrlar, hırsızlar da bundan kendilerinä gelir kazanȇrlar. Nesoy korunmaa bu iştän annadı bizim korrespondentımız.
Türlü onlayn programaların hem elektron kolaylıkların kullanılması gün-gündän zeedelener. Bununnan bilä yaşayannarın personal bilgileri korunması soruşu taa aktual olȇr. Hırsızların shemaları bu uurda pek hızlı diişerlär, bunun için yaşayannara taa dikkat olmaa lääzım, çizgiledi Komrat Polis İnsperaktoratlıın ofiţeri Stepan Terzi: «Bölä olaylar var ni̇cä başlasınnar romanti̇kalı hırsızlıklarlan hem başarılsınnar , açan polis yada bank uzmannarı adından sizä telefon açȇrlar. Hep ölä var nicä karşı gelmää viruslu kaynaklara, angılarını tıkladıynan düşer o sayta, angısı maasuz programanın yardımınnan çorbacının elektron kaynaandan bütün informaţiyayı çalȇr».
Bitki vakıtlar sıklaştılar olaylar, açan hırsızlar anılmış insannarın süretlerini hem seslerini uydurup danışmakları yaşayannara türlü tekliflärlän yapȇr. Bundan sora insanın personal informaţiyası kablediler, nışannadı uzman.
«Hırsızlar yapȇrlar videorolikleri, kullanarak anılmış insannarın sürelerini hem seslerini. Koyȇrlar onu türlü platformalara. İnsannarın kimisi inanȇr bu işä, ama bizä informaţiya etişincä , kimisi aldanıp, kullanȇr bu platformaları»,- çizgiledi Stepan Terzi.
Bank uurunda ekspert Vitaliy Ţvätkov nışannadı, ani hırsızların bu şiretlikleri taa sık doorudulu hızlılaa, ki insan birdän karar versin hem onun vakıdı düşünmää olmasın.
«Eer neredäsä cümnä baalantılarında siz karşı gelärseniz tekliflärlän hızlı kredit alması için, yada yaarım saatta karar vermesi için, yada ani siz düşersiniz 100 kısmetli insanın arasına kimä veriler bu kolaylık, bilin, ani bu hırsızlık»,- ekspert Vitaliy Ţvätkov nışannadı.
Hep ölä uzman çizgiledi, ani bir dä bank hiç bir sıra telefon açmȇȇr insannara personal informaţiyayı kabletmää deyni, bölä olaylar da yaşayannarın dikkatlıını çeksinnär yakışȇrlar.
«Bölä durumnarda teklif ederiz bu insannara bir da bilgi kendiniz için vermeyäsiniz. Sizin için informaţiya sizin bankınızda var»,- ekspert nışannadı.
Uzmannar teklif ederlär yaşayannara karşı geldiysedilär bölä olaylarlan danışsınnar polis uzmannarına. Finans hırsızlıınnan karşı gelärseydilär sä, o saat bank uzmannarını bildirtsinnär.
Avtor: A. Terzi, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!