Halk birlii günä adalı konferenţiya Komratta geçti. Bu olaya katıldılar Gagauziya başkanı, GHT başı, deputatlar hem aktivistlär.
Gagauziya başkanı Evgeniya Guţul nışannadı, ani Halk birlii günü – o simvol gagauz halkın birleşmesindä, angısı görer kendi geleceeni baamsız Moldova Respublikasında.
«Bakarak geçmiş zamannara biz aarȇrız dayanmak erlerini, ki ileri gitmää da savaşȇrız faydalı çıkışları yapmaa. Bu gün getirer aklımıza, ani Gagauziyanın kuvedi birleşmektä, adetlerimizin saymasında hem istemektä ileri gitmää bakmayarak kösteklerä. Saalık sizä, kaavi ömür hem başarları hepsi işlerdä. Yortuylan sizi dostlar. Biz getireriz aklımıza, nasıl zor günnär hepsimiz biz barabardık da genä gösterdik , ani gagauzlar kaavi . Gagauzlar giderlär dooru yoldan da bizi hiç kimseycek kırmayacek nasıl da istämesinnär»,- nışannadı Gagauziya başkanı Evgeniya Guţul.
Gagauziya var nasıl demokratik zor davaaları çözsün, nışannadı Gagauziya Halk topluşun başı Dmitriy Konstantinov: «Gagauziya gösterdi, ani zor vakıtta o birleşer. O kendi halkı için düşüner. Gagauzlar gösterdilär hepsi dünneyä, nasıl zor soruşlarda onnar göstererlär kendilerini. Onnar gösterdilär, ani demokratik yollarından giderlär. Görsün hepsi dünnä».
Birleşmäk — o halkın ilerlemesindä baş prinţipi, sayȇr Moldova parlamentin deputatı Aleksandr Suhodolskiy: «Büün pek önemni bir olay geçer Gagauzya için hem cümnä için, angısı kalmȇȇr bir tarafta gagauz halkından. Bölä olaylar lääzımnı. Onnar göstererlär gençlerä, nicä lääzım birlii korumaa bizim gagauz cümnemizdä. Taa bir keret hepsini kutlȇȇrım bu günnän, bu yortuylan. Bu olay gösterer , nekadar biz birleşikiz».
«Gençlär lääzım bilsin, kim onu yaptı. Bän saa ol deerim hepsinä, bütün Gagauziyaya da isteerim sölemää, ani pak bölä büük yortularllan biz gösterecez, ani bizim halk girgin, toplu, birliktä biz Gagauziyayı koruyacȇz hepsindän»,- nışannadı Cümnä aktivisti Mihail Vlah.
Halk birlii gününü Gaguziyada kabletti GHT 2017-ci yılın aprelin 14-dä.