Gagauziyadan gençlär var nicä üürensinnär Türkiyenin üüsek üüretim kurumnarında. Türkiye hükümeti avtonomiyadan studentlerä hem başarannara verer. Programaya görä stipendiyalar veriler yabancı studentlerä, kim bakalavr, magistratura hem doktorantura uurlarına Türkiyeyä üürenmää geler.
Türkiyenin universitetlerindä üürenmää isteyennär Türkiye Scholarships Bursları saytında maasuz elektron formasını lääzım doldursunnar.
«Türkiye Scholarships Bursları» programasının başkan yardımcısı Sayit Yusuf habrledi, ani programaya görä studentlerin önemni payı türk dilindä ayırȇr üürenmää.
Türkiyedä stipendiyayı kabletmää deyni abiturientlar var nicä türkçe bilmesinnär. Onnar var nasıl englez dilindä üürenmeyi ayırsınnar, ama TOEFL testın sonuçlarını sayta erleştirmektän sora.
Türkiye stipendiya programası hepsi isteyennerinä verer kolaylık parasız Türkiyenin en istenilän universitetlerindä parasız üürenmää. G. Gaydarcı adına liţeyin başarannarı açıkladılar GRT kanalına, ani deneyeceklär kendi dokumentlerini yollamaa ki bu programaya girmää.
«Bän zanaat kendimä ayırmadım taa, ama yaklaştı vakıt onu belli etmää. Türkiyedän temsilcilär islää kolaylık için bizä annattılar. Beni meraklandı bu ideyä. Bän düşünecäm. Neredä dä üürenmesäm islää olacȇydı evä geeri dömää hem kabledilmiş bilgileri burada kullanmaa devletimizi ilerletmää deyni».
«Bän hep okadar birkaç aşırıda bulunan universitetlerä kendi dokumentlerimi yollayacam. Bu sayta da erleştirecäm kendi dokumentlerimi. Er benim kısmedim sä neçin gitmemää. Dünneyi görmää, eni bilgileri kabletmää».
Stipendiyä ödeer Türkiye universitetindä bütün kontraktı üürenmenin herbir yılı için; 100, 250 dollar studentä stipendiyä ödener hem parasız pansion. Studentlär 1 yılın süresindä türk dilini var nicä olacȇk üürensinnär. Programa sigorta parasını da verer. Danışmakları türk stipendiyasını kabletmäk için bitki gün fevral ayın 20 belirlendi.
Haberin foto – simbolun kaynaa imtilak.net