Gagauziya başkanı Evgeniya Guţul annattı Gagauziyanın başarları hem problemaları için GRT kanalında Obşestvennıy interes programasında. Önemni proektlär için, regionun problemaları için hem merkez kuvetlerinnän dialogun geçirmesi için Natalya Andrieş annadȇr.
«GRT» kanalında Obşestvennıy interes programasında Evgeniya Guţul belli etti kendi işin çıkışlarını hem da paylaştı plannarlan gelecek vakıdına. Avtonomiyanın başı urguladı, ani onun komandası neetlener ilerletmää proektlerin yapılmasını regionun geliştirmesi için. Başkanın laflarına görä baş problema, angısı 30 yılın içindä çözülmedi- o gençlerin gitmesi aşırıya.
«Вiz isteeriz ileriya dooru da proyektleri giriştirmää, ki insan burada işlesin. Yazık, ani bizdä Moldovada durum diil stabil. Bizdän diil sade gençlär giderlär, investorlar kaçȇrlar»,- nışannadı başkan.
Şindi Gagauziyada çözmäk yollarını aarȇrlar, ki Moldova universitetlerin başarannarı evä Gagauziyaya gelsinnär, ekledi Evgeniya Guţul. O haberledi, ani çok er infrastrukturaya veriler. Başkan nışannadı, ani bu yıl diil bücet paralara 60 kilometra yol yapıldı. Aklına getirdi proektleri üüretmäk kurumnarın modernizaţiyasınnan baalı, nereyi girer yısıtmak sistemasının diiştirmesi hem imäk odaların remondu. İnsannara yardım hep ölä veriler.
«Para verilecek bücet sferasına hem pensionerlerä. Bu yardım iki bin ley kuracek. Biz gördük, nekadar kritika yapılȇr . Bu proekt 8 ay işleer hem işleyecek»,- nışannadı Guţul.
Suuk zamanı için insannarın kimi kategoriyaları kabledeceklär birär bin ley. Bu yılın dekabir ay için ödemekleri kabledeceklär yanvar ayında. Guţul Evgeniyanın laflarına görä ilk keret 30 yılın içindä GHT hem Bakannık komitetin aralarında annaşmak oldu. Bu verer kolaylık taa faydalı avtonomiyayı ilerletmää. Ama o urguladı, ani pek önemni Moldovanın merkez kuvetlerinnän annaşmak baalantılarını kurmaa, ama bu şindi taa çözülmedik kalȇr.
«Bän annȇȇrım, ani biz barabar çalışalım lääzım, ama var nasıl başka variant da olsun, ani Kişnovun iniţiativasına görä dialog olmayacek. Hepsi onnarın bakışları hem düşünmekleri buna getirerlär»,- annattı avtonomiya başkanı.
Evgeniya Guţul söledi, ani onun komandası ilerledecek çalışmaa insanın hatırı için bakmayarak zorluklara. Bölä koşullarda yapıldı proektlerin en büü Gagauzlend. Burada bu günnerdä geçti kış zamanın açılması, ekledi başkan.
«Bu proekt pek önemni, neçinki verer kolaylık açmaa iş erlerini, orada gençlär işleerlär, hem da ekonomika agentlerinä satmaa kendi mallarını da bu verer kolaylık»,- dedi başkan.
2024-cü yılın bitki günü Gagauzlendta geçeceklär türlü yortulu olaylar uşaklar hem büüklär için. Guţul Evgeniyanın laflarına görä, eer dekabinin 31-dä kaar olmasaydı, burada o yaacek.
