Minçoglo İlya Hristoforoviç «Evelki oyuncular» ansamblisinin işini ilerleder. Bu kolektiv türlü devletlerä gitti da gagauz kulturasını tanıttı. İlya Hristoforoviç gençliindä 11 yıl «Düz –Ava» ansamblisindä oynaadı. Yapardı bunu bütün ürektän hem dä büük sevgiylän. Da tä 13 yıl geeri kararladı, ani enidän oynamaa başlayacȇk.
«İkl gün toplandık 7 kişi. İlk repetiţiyaya geldi 11 kişi. Bu oldu dekabrinin bitkisindä. Dä fevralin 7-dä biz oynadık sţenada S.Pometkoya adalı konţerttä. Osoy biz duyduk kendimizi kısmetli», — söleer İlya Hristoforoviç.
Aftada 3 keret İlya Hristoforoviç oyuncu hem horeograf olarak Kultura evinä geler. Avalar çalȇr, oyuncular da oynȇȇrlar. Elleri ayakları bir, üzleri-gözleri güler. Yannışlıkları horeograf alatlȇȇr doorutmaa, ki sora sţenada, siiredicilerin karşısına çıktıynan hepsi islää olsun.
Siiredicilerin en sevgili oyunu «İki maalä». Oyuncuların biri düşer. Ama bu sţenariyä görä.
«Bu oyun girdi ilkin bizim üreemizä sora dä siiredicilerin. Açan seftä gösterdik bu oyunu insan zal içindä kalktı da şamarlarını düümää başladı», — söleer oyuncu İvan Trinka.
«Bizim horeografımız pek islää — Minçoglo İlya Hristoforoviç. O bizi üüreder. O isteer, ki bizim oyunnarımız üüsek uurda olsunnar», — söleer oyuncu Olga Patutina.
«Açan bizi festivallerä çaarȇrlar biz gurur duyȇrız. Biz orada ana kulturamızı tanıdȇrız», — söleer oyuncu Valentina Pometko.
«Yaşlarımız çok, ama ihtär diiliz. Yok nicä adam olsun ihtär, açan canın çeker oynamaa», — söleer oyuncu Grigoriy Çeban.
Oyunnar insanın yaşamasını, ecellini açıklȇȇrlar.
«Açan görersin, nesoy insan oynȇȇr, annȇȇrsın nesoy yaşamak bu insannarda, bu aylelerdä, bu devlettä» — söleer İlya Minçoglo.
«Evelki oyuncular» ansamblisi mayıl eder siiredicileri oyunnarınnan, açık üreklerinnän hem halk oyunnarına sevgilerinnän.
Avtor: V. Çoban, operator: S. Georgiev, montaj: İ. Rezuneţ
Moldovanın hem Gagauziyanın en mekalı haberleri GRTnın Telegram kanalında!