Çadır kasabasının birinci uşak başçasında giderlär işlär örtü düzülmesindä. Bu yapı 1973-cü yıldan işleer da kapital remont pek lääzımdı, nışannȇȇr kasaba administraţiyası.
Çadır-Lunga mun.primarı Anatoliy Topalın laflarına görä bu zamannarda uşaklar erleştirili kasabanın başka uşak başçalarında.
«Büük bir proekt geliştireriz uşak başçasında, angısına 200 uşak gezer. Bu işlerä erindeki bücettän verildi 1,5 million ley. 2-3 aftanın süresindä başaracȇz.Sora güneş panelleri koyacez. Bu bir uşak başçası, neredä örtü diişilmedi. Ama panellerin koyması verecek kolaylık arttırmaa 40 proţent gaz. Arttırılmış paralar doorulanaceklar üüretmäk proţesi için lääzımnı tertipleri almaa» ,- haberledi Anatoliy Topal.
Uşak başçasında terbiediler yakın 200 uşak, angılarına sıra geldi başka yaslalara gitmää. Örtünün düzülmesi çeketti noyabrinin ilk günündän, haberledi uşak başçasının başı Svetlana Jelezoglo.
«Lääzım nışannamaa, ani 15 yıl geeri örtünün bir payı düzüldüydü, ama şindi o bütündän yapılȇr. Bu işlerdän sora bizim uşak başçamızda infrastruktura diişecek. O pek lääzımnı» ,- sayȇr Jelezoglo.
Taa ileri uşak başçasında içindeki remont işleri odaların taa çoyunda yapıldılar.
«Bizim uşak başçamızda pek aydınnık hem büük grupalar. Ayırı var uymak için içerlär. Birkaç yıl geeri biz pençereleri diiştirdik, kufneyi, yıkamak odasını düzdük. Ama işlär ilerlenerlär»,- dedi yaslanın başı Svetlana Jelezoglo.
2025-ci yılına karşı uşak başçası açacek kapularını kendi terbiedennerinä. Yaslanın administraţiyası neetlener ileriya dooru eniletmää kalan odaları da türlü proektlerin yardımınnan.
