Evropa Aar atletika çempionunu Erigina Elenayı kutladılar onun ana sport okulunda, neredä o çeketti kendi sport yolunu hem kabletti ilk ödülleri.
Evropa aar atletika çempionu Elena Erigina kazandı üç altın ödül, bütündän kaldırıp 242 kila. Bakannık komitetin başı ilk yardımcısı İlya Uzun nışannadı, ani Elena oldu gagauz halkın hodulluu. Gagauziya Başkanın adından o kutladı onu üüsek uurda pay almaklan bu yarışmalarda hem urguladı, ani avtonomiyanın Başkanı siiretti, nicä Elena kalktı şannı pyedestala.
«Bän isteerim sölemää, ani diil sade biz seninnän hodullanerız, ama hodullanȇr bütün Gagauz avtonomiyamız hem bütün devlet. Sän gösterdim , ani senin çıkışın kalacek istoriyada. Bulunacek mı insan, angısı tekrarlayacek senin çıkışını, biz da sevinecez»,- nışannadı İlya Uzun, Bakannık komiteti başının ilk yardımcısı.
Gençlik hem sport bakanı Väçeslav Dragoy nışannadı, ani gagauz sportçuları , angıları pay aldılar yarışmalarda , gösterdilär, ani Komrat aar atletika sport okulunda terbiederlär haliz çempionnarı. Da bunu gösterdi Elena Erigina. Hep ölä o urguladı trenerlerin işini dä.
«Bän sayȇrım, ani siz — Gagauziyanın kahramannarı, devletin kahramannarı, da biz sizinnän hodullanȇrız. Bizdä vardı kolaylık gitmää Evropa çempionatına, görmää, da isteerim sölemää, ani bu zor iş»,- dedi Väçeslav Dragoy, gençlik hem sport bakanı.
Gagauziya aar atletika federaţiyası başı Konstantin Zlatov nışannadı, ani Elenanın taraması — bu yortu diil sade okula, ama bütünnä avtonomiyaya.
«Bän isteerim şükür etmää okulun trenerlerini, okulun başlarını hem büük saa ol sölerim Gagauziyanın başlarına yardım için. Açan birerdä işlär yapılȇrlar, hepsi olȇr»,- Konstantin Zlatov nışannadı.
Elenanın kocası hem treneri Vladımır Erigin nışannadı, ani bu taramak diil kolay verildi. Onun çıkışı oldu o , ani devletin kumbarasına üç altın ödül getirildi.
«Çoyu görerlär sadece taramakların tepesini, bu diil sade ştanganın kaldrılması , kimsey görmeer, ne zorlukları geçer, bu terener işi dä. Lääzım bütünnä bu işleri görmää. Bu diil sade taramak bir-iki minudun içindä, bu çok yılların sınışları»,- nışannadı Vladimir Erigin, aar atletika treneri.
Regional aar atletika sport okulun başı Viktor Mavrodi nışannadı, ani Elena haliz kalacek istoriyamızda hem örnek oldu genç evlat boylarına.
«Dün o oldu çempion, büün o — istoriya, da bunu birerdän silmeyecän, saklamayacan, o bizdä her keret hodulluk örnää»,- Viktor Mavrodi nışannadı.
81 kilalık çeki kategoriyasında Elenanın vardı çok kaavi konkuretları.
«Bu yıl konkurenţiya taa kaaviydi, nekadar geçän yıl, sıra geldi kaldırmaa taa zeedä kila, hepsi kızlar kaavi hazırlıydılar»,- Evropa aar atletika çempionu Elena Erigina nışannadı.
Nicä nışannadı Elena Erigina, bu Evropa yarışmakları ona deyni bitkiydilär, bunda o başarȇr kendi sport karyerasını, da ilerledecek trener işini.
Moldovanın hem Gagauziyanın en mekalı haberleri GRTnın Telegram kanalında!