Laf Donor latin dilindän çeviriler nicä «baaşlamaa». Baaşlamaa yaşamak. Busoy kolaylık var herbir insanda 18 yaşından 60 yaşından. Kimin saalıı kaavi var nasıl katılsınnar akţiyaya, angısı halklararası kan donorların gününä adalı. Busoy tekliflän avtonomiyanın yaşayannarına danışȇrlar Komrat dolay bolniţasının Kan vermäk bölümün uzmannarı.
Bölüm işini başlȇȇr saat 8 sabaalen, ki etiştirmää kabletmää hepsi donorları, kullanarak hepsi lääzınmı kuralları. Kan vermäk için merezi kuvet koyȇr, ki gençlär bilsinnär nekadar önemni kan insan için hem mediţina için. Da bu iilik işinä katılmak için karar alsınnar.
«Bän burada artık 18 yıl işleerim. Donorlara büük saygım var. Onnar insanın yaşamalarını kurtarȇrlar»,- nışannadı Komrat dolay bolniţasının Kan vermäk bölümü izmetçisi Mariya Hadji- Yani.
Donorlar bu bölümä geler neetlän kurtarmaa zor durumda bulunan insannarın saalıklarını hem yaşamalarını, söleer Komrat dolay bolniţasının Kan vermäk bölümü Semön Dragnev: «Şaşȇrım donorların istemesinä fayda getirmää, faydalı olmaa. Onnar istämeerlär onnarı metetsinnär yada ödüllesinnär. Onnar buraya insannara yardım etmäk için gelerlär».
Komrat dolay bolniţasının Kan vermäk bölümü izmetçileri urgulȇȇrlar, ani donorları şükür etmäk laflarını beklämeerlär. Yaptıkları için gramota hem medali istämeerlär. Bilmää , ani onnarın kanı fayda getirdi birkimseyä – eterli. Bundan kaarä fayda olȇr onnarın güüdelerinä da. 450 mililitra kan verdiktän sora insanın kanı enilener, saalıı kaavileşer, söleer medik izmetçisi Tatyana Radiola: «Başımı iilderim donorlarımızı önündä. Saa olsunnar. Onnar büük iilik yapȇrlar. Biz kendimiz dä donoruz. İki ayda 1 keret kan vereriz. Bu bizim için bir önemni kural».
Donor kanının Kagul kasabasında bulunan laboratoriyaya, neredä lääımnı araştırmaklar geçirilerlär. Böleliklär kan verän insannar her üç ay saalık durumnarı için üürenerlär. Hem dä başkalarının yaşamaklarını kurtarȇrlar.
«Seftä kan vererim. Bir kızçaaza deyni. O onkologiya derdinnän güreşer. Şükürlüyüm, ani var kolaylıım yardım etmää. Kimsey bilmeer, ne onu yarın bekleer. Bekim bizä dä kimin sä yardımı lääzım olacȇk».
«İkinci yıl artık kan verdi. İştän insannarlan bilä geldik. Hepsi denemekleri geçtik. Da tä 3 ayda 1 keret mutlak geleriz da kan vereriz».
Komrat dolay bolniţasının Kan vermäk bölümü izmetçileri urgulȇȇrlar, ani büünkü gündä kahraman olmaa pek kolay. Eter gelmää bu bölümä da donor olmaa.
Moldovanın hem Gagauziyanın en mekalı haberleri GRTnın Telegram kanalında!