Kirez ayın 27-dä geçän HT oturuşunda bakıldılar soruşlar, angıları baalıydılar üüretim, seçim proţesleri, bücet hem başka uurlarlan.
Bakarak soruşu, angısı baalıydı «Gagauziya Bakannık kimiteti» kanonunnan, angısını başkan imzalamayıp geeri çevirdi, deputat Sergey Zahariya meraklandı kanonu geeri çevirmäk sebepinnän.
«Bu kanona imza koymamanın sebepi nedä?Var mı nicä üürenmää?»,- sordu deputat Sergey Zahariya.
Gagauziya başkan işleri bakanı İvan Kolioglo açıkladı sebepi, angısına görä bu kanon Gagauziya Başkanınnan imzalanmadı.
«En önemni iş, angısınınnan diil kayıl Bakannık komiteti toplu onda, ani Bakannık komiteti azaları bir vakıtlık iş görevlerindä bütün kuvettän işlerini yok nicä gerçeklesinnär. Kalan momentlär diil okadar önemni», — cuvap etti İvan Kolioglo.
«Yakışarsa, açıklayınız, neçin onnar yok nicä gerçeklesinnär işlerini»,- istedi üürenmää Zahariya.
«Bir vakıtlık iş görevlerindäykän Bakannık komiteti azaların yok hakları uzun vakıda kararları imzalasınnar»,- annattı Kolioglo.
«Pek önemni iki uurda kuvet işindä olaylar annaşıpta olsunnar. Lääzım nışannamaa, ani Bakannık komitetin poziţiyası herzaman açık olsun hem karşı gitmesin o kararlara, angıları Gagauziya kanonnarında var, te ne önemni»,- nışannadı Zahariya.
Oturuşun süresindä teklif edildi soruşa görä Başkan Vetosunu aykırlamaa, ama bu karar için kendi seslerini deputatların taa azı verdilär.
Avtor: A. Terzi, operator: V. Kıssa, montaj: İ. Rezuneţ
Moldovanın hem Gagauziyanın en mekalı haberleri GRTnın Telegram kanalında!