Kışı insannara geçirmää deyni, eterli hodun hazırlamaa, daa meralarını genişletmää — bu iki önemni davayı devlet «Daa çorbacılıı» kurumu gerçekleştirer. Bu kurumun başı Aleksandr Peykov GRT-nın cannı yayınında annattı, ani 2024-cü yılın ikinci payında 7 000 skladometra hodun hazırlandı. Satıldı 5,5 bin skladometra.
Fidannarı keserlär o erlerdän, neredä daaları enilemää lääzım. Buna «eniletmäk daa kesmesi» yada «sanitar daa kesmesi» deniler.
«2025-ci yılın ilk payında taa 6000 skladometra hodun hazırlamaa neetimizä koyduk», — söledi Aleksandr Peykov. 1 skaladometra hodunun paası, onun laflarına görä — 1150 ley kurȇr. Bu paayı devlet belli eder.
Moldovada «Daaları korumak hem dä daa meralarını büültmäk» milli programası giriştiriler. O 2023-cü yıldan 2033-cü yıla kadar sürtecek. Programaya görä, daa çorbacılıkların izmetçileri birliktä erindeki kuvetlärlän fidan dikerlär. Butakım, Gagauz Erindä artık 300 ektar eni daa koyuldu.
«Bu aaçları bakmaa hem dä beslemää lääzım, ki onnar iicä tutulsunnar hem dä büüsünnär», — cizgiledi Aleksandr Peykov.
O hep ölä belli etti, ani daa meralar Moldova topraklarının 25 % kaplasınnar lääzım. Ama Moldovada bu sayı yakın 10 % kurȇr.
A.Peykov çizgiledi, ani «Daaları korumak hem dä daa meralarını büültmäk» milli programası başarılı olarsa 2033-cu yıldan devlettä taa meraları 5 % zeedeleneceklär.
