Gagauziyada, kimi çiftçi çorbacılıklarında çeketti güzlük bereketin toplaması. Kırların gezintelerindä belli oldu, ani diil hepsi liderlär toplamayaceklar bereketi. Buna sebep ilkyaz dondurmakaları hem da kuraklık, angıları pek kötü belli ettillär kendilerini , nicä ilk grupanın bereketindä, ölä da çok yıllık büümnerindä. Bakannık komitetin oturuşunda Gagauziya Agrar kompleksın başı Sergey İbrişim yaptı çıkışları da nışannadı, nesoy kayıplaraktlara görä, angılarını verdilär çiftçilär. Çoyu çok yıllık kulturalara görä, kayıplar kurȇr yakın 34 million ley, güz kulturalarda kayıplar sa kurȇr 3 million ley.
Bu yılın ilkyaz zamanın kuraklıı belli oldu güz kulturalarında, hep ölä emiş fidannarında hem da kimi erlerdä çotuklarda dondurmaklardan sora kayıplar var. Ama may ayında yaamurlar biraz dooruttular durumu, ama diil hererdä. Nicä nışannadı Gagauziya Agrar kompleksin başı Sergey İbrişim kuruldular maasuz komisiyalar, angıları çıktılar kırlara, saydılar kayıpları.
«Şindi hükümetin hem da çiftçilik Ministerliin uurunda kabledilerlär ölçülär fermerlerä yardım etmää deyni, angılarında büük kayıplık oldu»,- nışannadı İbrişım.
Nicä nışannadılar regionun çiftçileri, bakmadaan hepsi zorluklara, angıları baalı havanın diişmesinnän, zamandaşta lääzım kayıpsız bereketi toplamaa ambarlara. Ama nesoy kayıplık oldu kuraklıktan hem da dondurmaklardan, var nasıl olacek sölemää, bereketin toplamasının sezonun başarmasından sora.
«Bu kuraklık taa pek belli etti güzlük boodayında, hem da te onnarda, kim sürüdü kırları, hem da ii gitti te o güzlüklerä, angıları taa geç ekildilär».
«Bekleeriz yakın iki bin tonadan raps bereketini, plannadık taa zedä, ama o üzerä, ani ilkyazın yaamadılar yaamurlar, o açılmadı. Bölä durum rapslan. İlk grupaylan sa durum butakım, yakın 150 ektar pek zararlandı, neçinki yaamadılar ilkyazın yaamurlar. Bu küüyün poyraz tarafı. Ne var, o var».
«Bän sayȇrım, ani booday olacek yakın 4 ton, arpa genä yakın bu sayıya olacek. Paa büün Evropa panerindä 170 evro, bu pek az, bıldır bu vakıt paa kurardı 224 evro, sora 245 evro».
«Dondurmaların beterinä zararlandılar sade Çeşmä küüyün kırları, güz boodayı, ama o taa çizgi gibi eşillener, bu kırlarda hiç bişey yok. Toplanacek 35 — 50 ektar».
«Dondurmaklar rapsta pek belli etmedilär kendilerini, boodayda sa bütündän».
Nicä nışannadı Gagauziya Agrar kompleksin başı Sergey İbrişim, avtonomiyanın çiftçileri şindän sora hazırlandılar toplamaa berekedi, tehnika hazır, var insan da.
«Var nasıl sölemää, ani büünkü günä kırlarda var islä bereket. Çadır — Lunga hem da Valkaneş rayonnarında ilk grupada, Komrat rayonu biraz geeri kalȇr, neçinki yaamadı okadar yaamur, nicä başka erlerdä. Bütündän toplamaa deyni bereket Gagauziyada var 36 bin ektardan zeedä güz boodayı, 5 bin güz arpası, 11 bin güz rapsı, bizdä bukadar raps hiç bir zaman ekilmedi. Büün paa ona kurȇr 8 ley 30 ban, goroh ta 100ektar»,- nışannadı agrar bakanı.
Onun için agrariyalar savaşȇrlar çıkarmaa tehnikayı kıra, hava verärkänä kolaylık toplamaa bereketi kayıpsız ambarlara.
Moldovanın hem Gagauziyanın en mekalı haberleri GRTnın Telegram kanalında!