İş vizitinnän Çeşmä küüyün sport okuluna geldi Gagauziya Başkanı Evgeniya Guţul, sport hem gençlär işleri bakanı Väçeslav Dragoy hem Valkaneş dolay administraţiyası başı İvan Kreţu. Buluşmak geçirildi, ki bakmaa planı yapının rekonstrukţiyası için, angısında sportlan zanaatlanmaa lääzım.
Regionun bücetindän verildi 300 bin ley remont işlerinä, ki içinDä bulunan odaları hem okulun örtüsünü düzmää. Şindi lääzım örtü düzülsün orada, neredä sport zalası bulunȇr hem içindeki işleri geçirmää. Gagauziya başkanı Evgeniya Guţul nışannadı, ani uşaklar lääzım uygun koşullarda sportlan zanaatlansınnar, yarışmaklara hazırlansınnar islää deyni.
«Bizim uşakalrımız lääzım ii koşullarda zanaatlansınnar hem islää becermekleri kabletsinnär, ki ileri dooru diil sade kendi küüyünü andırsınnar, ama bütün Gagauziyayı. Biz lääzım hepsini yapalım, ki koşullar islää hem uygun sportçular için olsunnar»,- dedi başkan.
Çeşmä küüyün primarı Pötr Madjar urguladı, ani işlerin bir payı şansora yapıldı. Bu yısıtmak sistemasının konulması. Ama taa çok lääzım yapılsın da buna para taa lääzım.
«Var büük problema bir kurumun örtüsünnän. Bizdä hazır proekt smeta dokumentaţiyası için. Primariya katılȇr bir proektä hem paraların bir payını bulduk, ama lääzım taa yakın 1 million 300 bin ley örtü diiştirmesi için hem da yapının düzülmesi için, neredä uşaklar dzüdo hem sambo güreşlerinnän zanaatlanȇrlar. Konuşmak faydalı oldu, umut ederiz, ani paralar olaceklar da biz kendi tarafımızdan yapacez hepsini, ne lääzım»,- nışannadı primar.
Gagauziya sport hem gençlerin işlerindä bakannıın başı Väçeslav Dragoy nışanandı, ani Çeşmä küüyündän sportçular islää çıkışları göstererlär regional hem dünnäarası yarışmaklarda. Ama uşaklarda islää koşullar olsunnar lääzım trenirovkaların geçirmesi için, ki başarları kazanmaa hem ileri dooru da.
«Barabar zaametçilärlän düşünerim, ani bizdä hepsi olacek, ki uşaklar geçirsinnär trenirovkaları ii koşullarda. Yıkanabilsinnär , odaları serinnetsinnär hem orada aydınnık olsun. Umutlanȇrız, ani bu verecek sportçulara hem trenerlerä stimul taa cuvaplı olmaa hem ii çıkışları göstermää. Hem da Gagauziyayı sevindirmää»,- nışannadı sport hem gençlik bakanı.
Çeşmä küüyün sport okulunda 30 uşak zanaatlanȇr.
