Moldovada büüyer şakalların sayısı. Gagauziyada var bölä olaylar. Ekspertlär sayȇrlar, ani şakallar geldilär bizä başka kasabalardan, da onnarın sayısı büüyer. Avcılar söleerlär, ani lääzım bu problemayı çözmää.
Şakalların sayısının büümesi için söledi Gagauziyanın avcısı Valeriy Mitioglo. Onun laflarına görä, avcılar hazır karışmaa bu olaylara, ama lääzım almaa izin Ekologiya Ministerliindän.
«Bu problema pek büük, ama biz yok nica öldurelim onnarı Ekologiya Ministerlii izin vermedän. Açan çıkȇr Ministerliin kararı, avgust ayında her yıl açılȇr avcılar zamanı. Ozaman biz var nicä karışalım. Ama şindi biz yok ne yapalım. Ekologiya Ministerliin kararı açan çıkacek, biz yapacez grupaları, angıları uraceklar şakalları»,- nışannadı avcı.
Şakalların sayısının büümesi için söledi Çadır — Lunga avcısı Aleksandr Paşkovskiy. O söleer, ani yakın zamanda karışmazsak bu olaya, şakallar var nicä zarar versinnar ekologiyaya.
«Şakallar — köpeklerin soylarından, da onnarın sayısı pek hızlı büüyer, yılda onnar var nicä yapsınnar 3 — 4 sıra yavru. Onnar olaceklar lider üülen tarafında hem uzaklaştıraceklar başka hayvannarı: yaban domuzunu, tavşamnarı hem daa keçisini. Bizdä kalmayacek bişey, şakallar var nicä yok etsinnär fazannarı da»,- dedi avcı.
Bu problema için söleer çobannar da. Onnar kaybederlär hayvannarı, da kendi kuvetlerinnän savaşȇrlar korkutsunnar hayvannarı.
«Bizdä yok olduydu bu, bän nekadar işleerim, bendä yok bölä iş olduydu, yabanı çıksın. Bu kışın şakallar geldiydilär, firmaya sokulduydular şakallar, 3 gecä sıradan. Sora onnar kırlandı, da başka sokulmadılar. Gecelärlän uyumardık, beklärdik, diişilärdik. Vardı çocuklar, geldiydilär yardım etmää. 1 — 2 kişi uyuyardı, 2 — 3 kişi durardı, beklärdi. Korku vardı, ama teritoriyanın dolayında dönüşärdik, savaşardık kırlatmaa»,- nışannȇȇr çoban.
Respublika Moldova Avcılar hem Balıkçılar Kurumu haberledi, ani büünkü günnerdä şakalların sayısı kurȇr yakın 2 bin. Ekspertlär sayȇrlar, ani bu olay olacek taa kotü olmarsa çözüm.
Avtor: O. Lotka, operator: V. Kıssa, montaj: M. Kazaku
Moldovanın hem Gagauziyanın en mekalı haberleri GRTnın Telegram kanalında!