Çadır kasabasında bulundu Türkiyedän delegaţiya — Mugla, Menteşe, Bursa hem Osmangazı kasabalarından hem da Bulgariyadan Belene kasabasından.
Çadır kasabasına delegaţiyanın gelmesi oldu kardaşlık -kasabaların arasında barabar çalışmakların annaşmaklarına görä. Musaafirlär «AT-PROLİN fermasına gittilär — o regionun ayırı bir eri. Burada onnar gördülär atları, lafettilär çalışannarlan, soruşlarına cuvap aldılar. Mugla kasabasının başı Ahmed Aras hem Menteşe başı Gonca Köksal-Aras burada ilk keret bulundular.
Ahmed Aras, Mugla kasaba başı: «Biz çok sevdik hepsini, çok gözäl, şükür ederiz gagauz kardaşlarımızı, Çadır halkını , kasaba başını çok şükür ederiz».
Gonca Köksal-Aras, Menteşe başı: «Öncedän dä başka erlerä gittik, sınır aşırı programlarımız oldu, buralarda ii musaafir edildik, ama burada hiç musaafir diiliz, ev saabisi gibi, masamız bir, soframız bir, dilimiz bir, çok mutluyuz barada olmakta!»
Musaafirlerä faytonu da gösterdilär — adetçä oldu kolaylık gezinsinnär hem duysunnar evelki gagauz adetlerin derinniini. Menteşe kasabanın gezicilär birliin başı Orhan bey burayı üçüncü keret gelmiş.
Orhan Bey Menteşe kasabanın gezicilär birliin başı: «Bän burayı üç keret geldim, geçti 2024-cü yılda Kasıma geldik, may ayında Hederlezdä bulunduk delegaţiyaylan. Şindi gubernatorlar burada, Bursadan kardaşlarımız da. Biz geldik kan-kardaşlarımıza olmaa yanında yortuda».
Kendi duygularını açıkladılar Bulgariyadan da musaafirlär. Belene kasabasından delegaţiya azaları urguladılar, ani bölä buluşmaklar kaavilederlär kultura uurunda baalantarı hem dostluu halkların arasında.
Ekaterina Lazarova: «Pek şükür ederiz hepsi bu sıcak duygular için. Çadır kasabasının uşak oyun kolektivi Belene kasabasına geldilär. Şindi da biz primarın teklifinä görä geldik- oyuncular, artistlär, çalgıcılar».
Musaafirlär söledilär, ani alaceklar buradan diil sade renkli duyguları, ama o can sıcaklıını da, angısınnan onnarı kaarşıladı Çadır kasabası.