Eni tehnologiyaları şarapçılıkta hem baacılıkta, beslemäk malların kullanılması baalarda — bu temaları KDU studentleri açıkladılar. Ev şarap çobacılıın hem şarap kurumun işinnän tanıştılar. Olayı hazırladı KDU agrar fakulteti. Bu tombarlak sofralar geçirilerlär her yıl.
KDU agrar fakultetin studentleri tombarlak sofrada açıkladılar kendi doklatlarını hem lafettilär Gagauziyanın şarapçılık bölümü için, eni tehnologiyalar için hem malların kalitesi için.
Maria Bratunova KDU studenti: «Konferenţiyaya bän hazırladım konuyu, angısı baalı baaların hem topraan beslemsi minerallarlan hem başka elementlärlän, neçinki biz diil dooru kullanarsak onnarı toprakta, üzüm olmayacek. Pek faydalı organika da, angısı kullanılȇr toprakta».
Tombarlak sofranın işindä pay aldılar üüredicilär, studentlär, angıları üürenerlär hem kim başardı üüsek üürenmäk kurumunu da çalışȇrlar şarap kurumnarında. Nicä urguladı Tomay küüyün şarap kurumun başın yardımcısı Viktor Kirsanov, şarapçılık — bu diil sade çiftçilik bölümü, ama Moldovanın zenginnii, nicä da başka devletlerin.
«Biz lääzım her keret olmaa ilerdä, biz her keret lääzım işleyelim, ki tehnologiyalar olsunnar ii. Ki malları dooru tanıştıralım insannara, halklararası panayırlara. Moldova anıldı kendi şaraplarınnan, ama biz diil her keret onnarı gözäl tanıştırmaa. Da bizim Moldovanın şarapları lääzım taa üüsek uurda bulunsunnar panayırda»,- urguladı Viktor Kirsanov.
Agrar fakulteti dekanı Sergey Kara nışannadı, ani büüdärkän baaları, bu işin var kendi speţifikası. Büün diişer klimat , onun için lääzım türlü eni tehnologiyaları kullanmaa, angıları vereceklär kolaylık toplamaa zengin berekedi hem hep ölä üüsek kalitedä, urguladı o.
«Bän sayȇrım, ani baacılık, şarapçılık — bizim devletin zenginnii, da bu pek önemni bizim için. Örnek gibi, bän aldım bilgileri, becermekleri benim bobamdan, dädumdan, hem isteerim onnarı vermää kendi ooluma»,- Sergey Kara nışannadı.
Pay alannarın laflarına görä, olay geçti professional uurunda, birleştirip te onnarı, kim isteer baalamaa kendi yaşamasını baacılıklan hem şarapçılıklan.