Komrat kasabasının yaşayanı Viktor Drangoz baaladı kendi yaşamasını   ev şarabın yapmasınnan.  Viktor Drangozun şarapları her yıl  alȇrlar diplomnarı hem «altın fıçı» ödülünü    devlet hem Gagauziyanın şarap yortularından. 

Komrat kasabasının yaşayanı Viktor Drangoz söleer, ani ona deyni ev şarapların yapması- bu  aylä işi, o buna üürendi  kendi dädusundan, hem bobasından.  Ona deyni bu diil biznes, bu  aylä adeti, angısı çekiler taa dedelerdän. 20 yıldan zeedä  o  yapȇr şarap eskiycesinä. 

« Hepsi çekedildi  bizim dädulardan, bobalardan, angıları çalışardılar şarapçılık uurunda,  fıçı yapardılar,  benim  dädumun mamunun tarafından vardı stanokları,  o yapardı fıçı, salkımdan kadaları. Da bän şindi ilerlederim  dedelerin  zanaatını, beenerim bu işi, kimsä lääzım onu yapsın. Çünkü büün çoyu  baalarlarını kökleerlär»,- Viktor Drangoz söleer.   

Baalar Viktora deyni — bu er,  neredä o biler herbir çotuu, herbir pandalı. Da nicä o söleer, sevgisiz  baalara, yapmayacan kaliteli şarap.  O büüder eski  çeşitlerini.  

«Bän büüderim gibrid çeşitlerini,  erli çeşitlär bendä zayber, kara kuderka, angılarından bän yapȇrım  şarap kupajda. Var biraz biyaz kuderka, taa çok bu üç çeşit. Bän sayȇrım, ani bu gibrid çeşitleri taa ii, çünkü bän onnarı  serpmeerim»,-  Viktor Drangoz söleer.   

Viktorun maazasında kokȇr meşä aacınnan hem taazä şaraplan. O kullanȇr natural malları. Onda herbir fıçının var kendi istoriyası, herbir şarabın karakteri.

«Moldovanın poyraz tarafında  o taa geç  olȇr, etiştirmeer almaa şekeri lääzımnı  sayıda, bizdä başka klimat zonası, angısı yaklaşȇr bizim üzümnerä, maasuz  Dezginjedä. Lääzım olsun nicä Franţiyada,  isteerlär maasuz o çeşitleri, angıları büüdülü  maasuz erlerdä»,- Viktor Drangoz söleer.  

Duarlarda diplomnar hem gramotalar. Onun şarapları diil bir keret  kablettilär üüsek  ödülleri  hem altın fıçıları  Moldovanın hem Gagauziyanın  şarap yortularında.  Ama o kendisi sayȇr, ani bu önemni baaşışlar .

«Bu yıl kablettim ilk keret iki fıçı, bu desert şarabı için. Ama bän taa çok bu şarapları yapȇrım, ilk keret  gramota kablettim kuru şarap için, angısı bir yıldan zeedä  durdu maazada.  Hem diplom  pay almak için şarap yortusunda»,- Viktor Drangoz söleer.   

Her yıl Viktor Drangoz pay alȇr şarap yortusunda. Nicä söleer Viktor lääzım bölä oluşları geçirmää, ki adetlerimizi kaybetmemää.